ഓട്ടവ : കാനഡ പോസ്റ്റിലെ യൂണിയൻ ജീവനക്കാർ ഇന്ന് ഏറ്റവും പുതിയ കരാർ ഓഫറിൽ വോട്ട് ചെയ്യും. പുതിയ ഓഫറിൽ തപാൽ ജീവനക്കാർക്ക് 13 ശതമാനത്തിലധികം വേതന വർധനയും ആഴ്ചയിൽ ഏഴ് ദിവസത്തെ ഡെലിവറി നടപ്പിലാക്കാൻ ലക്ഷ്യമിട്ടുള്ള മാറ്റങ്ങളും ഉൾപ്പെടുന്നു. അതേസമയം ജീവനക്കാരെ പ്രതിനിധീകരിക്കുന്ന കനേഡിയൻ യൂണിയൻ ഓഫ് പോസ്റ്റൽ വർക്കേഴ്‌സ് ഈ ഓഫർ നിരസിക്കാൻ ആവശ്യപ്പെട്ടിട്ടുണ്ട്. ശക്തമായ നോ വോട്ട് ഓഫർ നിരസിക്കുക മാത്രമല്ല, വിലപേശൽ പ്രക്രിയയുടെ സമഗ്രത സംരക്ഷിക്കുകയും ചെയ്യുമെന്ന് യൂണിയൻ ദേശീയ പ്രസിഡൻ്റ് ജാൻ സിംപ്‌സൺ പറഞ്ഞു.
കാനഡ പോസ്റ്റുമായുള്ള ഒന്നര വർഷത്തിലേറെ നീണ്ട കരാർ ചർച്ച വഴിമുട്ടിയതോടെ മാസങ്ങളായി ഏകദേശം 55,000 തപാൽ ജീവനക്കാർ പണിമുടക്കിലാണ്. പ്രതിസന്ധി രൂക്ഷമായതോടെ ഫെഡറൽ തൊഴിൽമന്ത്രി പാറ്റി ഹജ്ദു ഇടപെടുകയും കാനഡ ഇൻഡസ്ട്രിയൽ റിലേഷൻസ് ബോർഡിനോട് കാനഡ പോസ്റ്റിന്‍റെ ഏറ്റവും പുതിയ ഓഫറിൽ വോട്ടെടുപ്പ് നടത്താനും നിർദ്ദേശിച്ചിരുന്നു.
