ഓട്ടവ : കാനഡ പോസ്റ്റിന്‍റെ ഏറ്റവും പുതിയ കരാർ ഓഫറിലെ വോട്ടിങ് അവസാന ദിവസത്തിലേക്ക് കടക്കുകയാണ്. യൂണിയൻ അംഗങ്ങളുടെ വോട്ടെടുപ്പ് ഇന്ന് വൈകുന്നേരം 5 മണിക്ക് അവസാനിക്കും. പുതിയ ഓഫറിൽ തപാൽ ജീവനക്കാർക്ക് നാല് വർഷത്തേക്ക് 13 ശതമാനത്തിലധികം വേതന വർധനയും ആഴ്ചയിൽ ഏഴ് ദിവസവും ഡെലിവറി നടത്താൻ ലക്ഷ്യമിട്ടുള്ള മാറ്റങ്ങളും ഉൾപ്പെടുന്നു.
അതേസമയം ഏകദേശം 55,000 തപാൽ സർവീസ് ജീവനക്കാരെ പ്രതിനിധീകരിക്കുന്ന കനേഡിയൻ യൂണിയൻ ഓഫ് പോസ്റ്റൽ വർക്കേഴ്‌സ് ഈ ഓഫർ നിരസിക്കാൻ നിർദ്ദേശം നൽകിയിരുന്നു. ജീവനക്കാർ ഓഫർ നിരസിക്കുകയാണെങ്കിൽ, ഉടൻ തന്നെ മാനേജ്‌മെന്റുമായി ബന്ധപ്പെടുകയും കരാർ ചർച്ച പുനഃരാരംഭിക്കാൻ ക്ഷണിക്കുകയും ചെയ്യുമെന്ന് യൂണിയൻ പറയുന്നു.
ജൂലൈ 21-ന് ആരംഭിച്ച വോട്ടെടുപ്പ് കാനഡ ഇൻഡസ്ട്രിയൽ റിലേഷൻസ് ബോർഡാണ് നടത്തുന്നത്. പ്രതിസന്ധി രൂക്ഷമായതോടെ ഫെഡറൽ തൊഴിൽമന്ത്രി പാറ്റി ഹജ്ദു ഇടപെടുകയും കാനഡ ഇൻഡസ്ട്രിയൽ റിലേഷൻസ് ബോർഡിനോട് കാനഡ പോസ്റ്റിന്‍റെ ഏറ്റവും പുതിയ ഓഫറിൽ വോട്ടെടുപ്പ് നടത്താൻ നിർദ്ദേശിക്കുകയുമായിരുന്നു.
