ഓട്ടവ : രാജ്യത്തിന്‍റെ സാമ്പത്തിക അഭിവൃദ്ധി, സാംസ്കാരിക വൈവിധ്യം, നവീകരണം എന്നിവയ്ക്ക് ഊർജ്ജം പകരുന്ന, കാനഡയുടെ ഇമിഗ്രേഷൻ സംവിധാനം നിയന്ത്രിക്കുന്ന ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുതുമുഖങ്ങളെ സ്വാഗതം ചെയ്യുന്നു. എന്നാൽ, കാനഡയിൽ പുതുജീവിതം ആഗ്രഹിക്കുന്നവർക്ക് വെല്ലുവിളിയായി, തുടർച്ചയായി മൂന്നാം മാസവും ഇമിഗ്രേഷൻ ബാക്ക്‌ലോഗ് വർധിച്ചതായി ഐആർസിസി റിപ്പോർട്ട് ചെയ്തു. പുതിയ ആപ്ലിക്കേഷനുകളും നിലവിലുള്ള ഇൻവെൻ്ററിയും അടക്കം കാനഡയുടെ ഇമിഗ്രേഷൻ ബാക്ക്‌ലോഗ് ജൂണിലെ 842,800-ൽ നിന്നും ജൂലൈ 31 ആയപ്പോഴേക്കും 901,700 ആയി വർധിച്ചതായി ഐആർസിസി അറിയിച്ചു. സേവന മാനദണ്ഡങ്ങൾക്കുള്ളിൽ 80% അപേക്ഷകളും പ്രോസസ്സ് ചെയ്യുക എന്നതാണ് IRCC ലക്ഷ്യമിടുന്നത്. എന്നാൽ 1,324,900 അപേക്ഷകൾ മാത്രമേ ഈ സമയപരിധിക്കുള്ളിൽ പ്രോസ്സസ് ചെയ്യുന്നുള്ളു.
പൗരത്വ, ഇമിഗ്രേഷൻ, താൽക്കാലിക വീസ എന്നിവ പ്രോസ്സസ് ചെയ്യാൻ ഇമിഗ്രേഷൻ ഡിപ്പാർട്ട്മെൻ്റ് നിശ്ചയിച്ചിട്ടുള്ള ശരാശരി സേവന നിലവാരത്തേക്കാൾ കൂടുതൽ സമയം എടുക്കുന്നതിനെയാണ് ഇമിഗ്രേഷൻ ബാക്ക്‌ലോഗ് എന്നതുകൊണ്ട് അർത്ഥമാക്കുന്നത്.
സ്ഥിര താമസ അപേക്ഷകൾ
ജൂലൈ 31 വരെ സ്ഥിര താമസ (PR) ഇമിഗ്രേഷൻ പ്രോഗ്രാമുകൾക്കായുള്ള IRCC യുടെ ഇൻവെൻ്ററിയിൽ ആകെ 892,400 അപേക്ഷകൾ ഉണ്ടായിരുന്നു. ജൂണിൽ ഇത് 896,100 ആയിരുന്നു. എന്നാൽ, കെട്ടിക്കിടക്കുന്ന അപേക്ഷകളുടെ എണ്ണം 415,800 (46.4%) ൽ നിന്ന് 443,500 (49.7%) ആയി വർധിച്ചു. എക്സ്പ്രസ് എൻട്രി, പ്രൊവിൻഷ്യൽ നോമിനി പ്രോഗ്രാമുകൾ (PNP-കൾ), ഫാമിലി സ്പോൺസർഷിപ്പുകൾ തുടങ്ങിയ പ്രോഗ്രാമുകൾ ഉൾക്കൊള്ളുന്നതാണ് പെർമനൻ്റ് റെസിഡൻസി (PR) അപേക്ഷകൾ.
താൽക്കാലിക റസിഡൻ്റ് പെർമിറ്റ് അപേക്ഷകൾ
ജൂലൈ 31 വരെ സ്റ്റഡി പെർമിറ്റുകൾ, വർക്ക് പെർമിറ്റുകൾ, സന്ദർശക വീസകൾ എന്നിവയുൾപ്പെടെയുള്ള 1,079,300 താൽക്കാലിക റെസിഡൻസി അപേക്ഷകൾ ഇൻവെൻ്ററിയിൽ ഉണ്ടായിരുന്നു. ജൂണിൽ ഇത് 1,040,700 ആയിരുന്നു. ബാക്ക്‌ലോഗ് 379,600 (36.5%) ൽ നിന്ന് 409,400 (37.9%) ആയി വർധിച്ചു. 669,900 അപേക്ഷകൾ (62.1%) സേവന നിലവാരത്തിൽ ഉൾപ്പെടുന്നു. 2025 ജനുവരി മുതൽ ജൂലൈ വരെ, 317,800 സ്റ്റഡി പെർമിറ്റ് അപേക്ഷകളും 825,600 വർക്ക് പെർമിറ്റ് അപേക്ഷകളും IRCC അന്തിമമാക്കി. എന്നാൽ, 37.9% ബാക്ക്‌ലോഗ് 80% പ്രോസസ്സിങ് ലക്ഷ്യം കൈവരിക്കുന്നതിലെ വെല്ലുവിളികളെ സൂചിപ്പിക്കുന്നു.
സിറ്റിസൺഷിപ്പ് ഗ്രാൻ്റ്
ജൂലൈ 31 വരെ, IRCC യുടെ പൗരത്വ അപേക്ഷകളുടെ എണ്ണം 254,900 ആയി വർധിച്ചു. ജൂണിൽ ഇത് 252,700 ആയിരുന്നു. 12 മാസത്തെ സേവന നിലവാരത്തിനുള്ളിൽ 206,100 അപേക്ഷകൾ (80.9%) വന്നതോടെ, ബാക്ക്‌ലോഗ് 47,400 (18.7%) ൽ നിന്ന് 48,800 (19.1%) ആയി വർധിച്ചു. ജൂണിൽ ഇത് 205,300 (81.3%) ആയിരുന്നു. പൗരത്വ അപേക്ഷകൾ ഏറ്റവും കാര്യക്ഷമമായ വിഭാഗമായി തുടരുന്നു. 20% ൽ താഴെയാണ് ബാക്ക്‌ലോഗ്, ഇത് IRCC യുടെ 80% ലക്ഷ്യത്തിനൊപ്പമാണ്.
