ടെക്സസ് : അലർജി സാധ്യതയെ തുടർന്ന് ബ്ലൂ ബെൽ മൂ-ലേനിയം ക്രഞ്ച് ബ്രാൻഡ് ഐസ്ക്രീം തിരിച്ചുവിളിച്ചതായി യുഎസ് ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ (FDA) അറിയിച്ചു. യുഎസിലെ പതിനഞ്ചിലധികം സംസ്ഥാനങ്ങളിൽ വിറ്റഴിച്ച ഈ ഉൽപ്പന്നം വാങ്ങിയവർ ഉടൻ ഉപയോഗിക്കുന്നത് നിർത്തി വാങ്ങിയ സ്റ്റോറിൽ തിരികെ നൽകണമെന്നും FDA നിർദ്ദേശിച്ചു. ഈ ഐസ്ക്രീമിൽ ബദാം, വാൾനട്ട്, പെക്കൻ തുടങ്ങിയ അലർജിക്ക് കാരണമാകുന്ന ചേരുവകൾ അടങ്ങിയിട്ടുണ്ട്. എന്നാൽ ഈ വിവരം ഉൽപ്പന്നത്തിന്‍റെ ലേബലിൽ രേഖപ്പെടുത്തിയിട്ടില്ല.
ഇതുവരെ ആർക്കും അലർജി സംബന്ധമായ പ്രശ്നങ്ങൾ റിപ്പോർട്ട് ചെയ്തിട്ടില്ല. ടെക്സസിലെ ബ്രെൻഹാമിലുള്ള ഒരു സ്ഥാപനത്തിൽ നിർമ്മിച്ച ഈ ഐസ്ക്രീം തെറ്റായ പാക്കേജിൽ വിതരണം ചെയ്യപ്പെട്ടതാണ് പ്രശ്നങ്ങൾക്ക് കാരണം. ‘Moo-llennium Crunch’ ഐസ്ക്രീം ‘Chocolate Chip Cookie Dough’ എന്ന ഉൽപ്പന്നത്തിന്‍റെ പാക്കേജിലാണ് വിപണിയിലെത്തിച്ചത്. കൂടുതൽ വിവരങ്ങൾ അറിയാനായി ഉപഭോക്താക്കൾക്ക് 979-836-7977 എന്ന നമ്പറിൽ വിളിക്കുകയോ അല്ലെങ്കിൽ consumerrelations@bluebell.com എന്ന ഇമെയിൽ വിലാസത്തിൽ ബന്ധപ്പെടുകയോ ചെയ്യാവുന്നതാണ്.
