വൻകൂവർ : സാൽമൊണെല്ല മലിനീകരണ സാധ്യതയെ തുടർന്ന് ബ്രിട്ടിഷ് കൊളംബിയയിൽ വിറ്റഴിച്ച ഷെയ്ഖ് അൽ കർ ബ്രാൻഡ് പ്ലെയിൻ ഹൽവ തിരിച്ചുവിളിച്ചതായി കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) അറിയിച്ചു. 2026 ഓഗസ്റ്റ് 25 ഉപയോഗയോഗ്യമായ ഹൽവ 400 ഗ്രാം പാക്കേജുകളിലാണ് വിറ്റത്. അതേസമയം 2027 ഫെബ്രുവരി 4 വരെ ഉപയോഗിക്കാവുന്ന ഇതേ ഉൽപ്പന്നം, സമാനമായ കാരണത്താൽ ഓഗസ്റ്റ് അവസാനത്തോടെ മറ്റ് പല പ്രവിശ്യകളിലും തിരിച്ചുവിളിച്ചിരുന്നു.
ഭക്ഷ്യ സുരക്ഷാ അന്വേഷണം നടത്തുന്നുണ്ടെന്നും ഇത് കൂടുതൽ തിരിച്ചുവിളിക്കലുകൾക്ക് കാരണമായേക്കാമെന്നും ഏജൻസി അറിയിച്ചു. തിരിച്ചുവിളിച്ച ഉൽപ്പന്നം ഉപേക്ഷിക്കുകയോ വാങ്ങിയ സ്റ്റോറിൽ തിരികെ നൽകുകയോ ചെയ്യണമെന്ന് ഫെഡറൽ ഏജൻസി നിർദ്ദേശിച്ചു. സാൽമൊണെല്ല കലർന്ന ഭക്ഷണം കേടായി കാണപ്പെടുകയോ ചീത്ത മണം ഉണ്ടാവുകയോ ഇല്ല. പക്ഷേ ഗുരുതരമായ ആരോഗ്യപ്രശ്നങ്ങൾക്ക് കാരണമാകും. കൊച്ചുകുട്ടികൾ, ഗർഭിണികൾ, പ്രായമായവർ, രോഗപ്രതിരോധ ശേഷി കുറഞ്ഞവർ എന്നിവർക്ക് ഗുരുതരവും ചിലപ്പോൾ മാരകവുമായ അണുബാധകൾ പിടിപെട്ടേക്കാം. ആരോഗ്യമുള്ള ആളുകൾക്ക് പനി, തലവേദന, ഛർദ്ദി, ഓക്കാനം, വയറുവേദന, വയറിളക്കം തുടങ്ങിയവ അനുഭവപ്പെടും. അതേസമയം കൂടുതൽ ഉൽപ്പന്നങ്ങൾ തിരിച്ചുവിളിക്കാൻ ഇടയാക്കുന്ന തരത്തിൽ ഭക്ഷ്യസുരക്ഷാ അന്വേഷണം നടത്തുന്നുണ്ടെന്ന് CFIA പറഞ്ഞു.
