ഓട്ടവ : കാനഡയുടെ ഇമിഗ്രേഷൻ സംവിധാനത്തിലെ വെല്ലുവിളികൾ തുടരുന്നതായി പുതിയ കണക്കുകൾ സൂചിപ്പിക്കുന്നു. പുതിയ ആപ്ലിക്കേഷനുകളും നിലവിലുള്ള ഇൻവെൻ്ററിയും അടക്കം കാനഡയുടെ ഇമിഗ്രേഷൻ ബാക്ക്‌ലോഗ് വർധിച്ചതായി ഇമിഗ്രേഷൻ, റെഫ്യൂജീസ്, സിറ്റിസൺഷിപ്പ് കാനഡ (IRCC) റിപ്പോർട്ട് ചെയ്തു. ഓഗസ്റ്റ് 31 വരെ ഒരു മാസത്തിനുള്ളിൽ ഇമിഗ്രേഷൻ അപേക്ഷകളിൽ 57,150 അപേക്ഷകളുടെ വർധന ഉണ്ടായതായി ഐആർസിസി ഡാറ്റ വ്യക്തമാക്കുന്നു. അതായത് ജൂലൈ 31 വരെ 901,700 അപേക്ഷകളായിരുന്നു ബാക്ക്‌ലോഗിൽ എങ്കിൽ ഓഗസ്റ്റ് 31 ആയപ്പൊളേക്കും 958,850 ആയി വർധിച്ചു. അതേസമയം മൊത്തം അപേക്ഷാ ഇൻവെന്‍ററി മുൻ മാസത്തെ 2,226,600-ൽ നിന്ന് 2,199,400 ആയി അല്പം കുറഞ്ഞു. ഓഗസ്റ്റിൽ ഇൻവെന്‍ററിയിലുണ്ടായിരുന്ന 2,199,400 അപേക്ഷകളിൽ 1,240,550 പൗരത്വ, സ്ഥിര താമസ, താൽക്കാലിക താമസ അപേക്ഷകൾ സേവന നിലവാരത്തിൽ പ്രോസ്സസ്സ് ചെയ്തു.
പൗരത്വ, ഇമിഗ്രേഷൻ, താൽക്കാലിക വീസ എന്നിവ പ്രോസ്സസ് ചെയ്യാൻ ഇമിഗ്രേഷൻ ഡിപ്പാർട്ട്മെൻ്റ് നിശ്ചയിച്ചിട്ടുള്ള ശരാശരി സേവന നിലവാരത്തേക്കാൾ കൂടുതൽ സമയം എടുക്കുന്നതിനെയാണ് ഇമിഗ്രേഷൻ ബാക്ക്‌ലോഗ് എന്നതുകൊണ്ട് അർത്ഥമാക്കുന്നത്.
സിറ്റിസൺഷിപ്പ് അപേക്ഷകൾ
ഓഗസ്റ്റ് 31 വരെ സിറ്റിസൺഷിപ്പ് അപേക്ഷകളുടെ പട്ടിക 259,500 ആയി. ഇതിൽ പൗരത്വ അപേക്ഷകളിൽ 19.7% ബാക്ക്‌ലോഗിലാണ്. 51,200 എണ്ണം. 208,300 (80.3%) അപേക്ഷകൾ സേവന മാനദണ്ഡങ്ങൾക്കുള്ളിൽ പ്രോസ്സസ്സ് ചെയ്തതായി ഐആർസിസി അറിയിച്ചു. സിറ്റിസൺഷിപ്പ് ഗ്രാൻ്റ് അപേക്ഷകൾ വേഗത്തിൽ പ്രോസ്സസ് ചെയ്യുന്നതായി ഐആർസിസി ഡാറ്റ വ്യക്തമാക്കുന്നു.
സ്ഥിര താമസ അപേക്ഷകൾ
ഓഗസ്റ്റ് 31 വരെ സ്ഥിര താമസ (PR) ഇമിഗ്രേഷൻ പ്രോഗ്രാമുകൾക്കായുള്ള IRCC യുടെ ഇൻവെൻ്ററിയിൽ ആകെ 901,800 അപേക്ഷകൾ ഉണ്ടായിരുന്നു. ജൂലൈയിൽ ഇത് 892,400 ആയിരുന്നു. എന്നാൽ, കെട്ടിക്കിടക്കുന്ന അപേക്ഷകളുടെ എണ്ണം 443,500-ൽ നിന്നും 470,300 ആയി വർധിച്ചു. എക്സ്പ്രസ് എൻട്രി, പ്രൊവിൻഷ്യൽ നോമിനി പ്രോഗ്രാമുകൾ (PNP-കൾ), ഫാമിലി സ്പോൺസർഷിപ്പുകൾ തുടങ്ങിയ പ്രോഗ്രാമുകൾ ഉൾക്കൊള്ളുന്നതാണ് പെർമനൻ്റ് റെസിഡൻസി (PR) അപേക്ഷകൾ.
താൽക്കാലിക റസിഡൻ്റ് പെർമിറ്റ് അപേക്ഷകൾ
ഓഗസ്റ്റ് 31 വരെ സ്റ്റഡി പെർമിറ്റുകൾ, വർക്ക് പെർമിറ്റുകൾ, സന്ദർശക വീസകൾ എന്നിവയുൾപ്പെടെയുള്ള 1,038,100 താൽക്കാലിക റെസിഡൻസി അപേക്ഷകൾ ഇൻവെൻ്ററിയിൽ ഉണ്ടായിരുന്നു. ജൂലൈയിൽ ഇത് 1,079,300 ആയിരുന്നു. ബാക്ക്‌ലോഗ് 409,400-ൽ നിന്ന് 437,300 ആയി വർധിച്ചു. 600,750 അപേക്ഷകൾ സേവന നിലവാരത്തിൽ ഉൾപ്പെടുന്നു.
