എഡ്മിന്‍റൻ : കഴിഞ്ഞ മാസം കാനഡയിലെ മറ്റേതൊരു പ്രവിശ്യയേക്കാളും കൂടുതൽ തൊഴിലവസരങ്ങൾ ആൽബർട്ടയിൽ ഉണ്ടായതായി സ്റ്റാറ്റിസ്റ്റിക്സ് കാനഡ. ജൂലൈ, ഓഗസ്റ്റ് മാസങ്ങളിൽ രേഖപ്പെടുത്തിയ ഇടിവിനെ മറികടന്ന് ആൽബർട്ടയിലെ തൊഴിലവസരങ്ങൾ 43,000 വർധിച്ചതായി ഏജൻസി വെള്ളിയാഴ്ച പുറത്തിറക്കിയ സെപ്റ്റംബറിലെ ലേബർ ഫോഴ്‌സ് സർവേ സൂചിപ്പിക്കുന്നു. ഇത് മുൻ മാസത്തേക്കാൾ 1.7% വർധനയാണ് രേഖപ്പെടുത്തിയത്.
റിപ്പോർട്ട് അനുസരിച്ച്, ഉൽപ്പാദന മേഖലയിലും (7,900 ജോലികൾ) കൃഷിയിലും (4,500 ജോലികൾ) തൊഴിൽ വർധന ഉണ്ടായി. ആൽബർട്ടയുടെ സെപ്റ്റംബറിലെ തൊഴിലില്ലായ്മ നിരക്ക്, അതേസമയം, ഓഗസ്റ്റിൽ നിന്ന് 0.6% കുറഞ്ഞ് 7.8 ശതമാനമായി. ഇത് മുൻ വർഷത്തെ അപേക്ഷിച്ച് (7.5 ശതമാനം) വലിയ മാറ്റമൊന്നും വരുത്തിയില്ല. അതേസമയം ആൽബർട്ടയിൽ തൊഴിലില്ലായ്മയിൽ ശ്രദ്ധേയമായ കുറവുണ്ടായെങ്കിലും, അതിന്‍റെ നിരക്ക് ഇപ്പോഴും ദേശീയ നിരക്കായ 7.1 ശതമാനത്തേക്കാൾ കൂടുതലാണ്.
ആൽബർട്ട നഗരങ്ങളിലെ തൊഴിലവസരങ്ങൾ
എഡ്മിന്‍റനിലെ തൊഴിലില്ലായ്മ നിരക്കിൽ സെപ്റ്റംബറിൽ വലിയ മാറ്റമൊന്നും ഉണ്ടായില്ല. ഓഗസ്റ്റിലെ 8.5 ശതമാനവുമായി താരതമ്യപ്പെടുത്തുമ്പോൾ ഇത് 8.7 ശതമാനമാണ്. കാല്‍ഗറിയില്‍ 8.1 ശതമാനമായി തൊഴിലില്ലായ്മയില്‍ നേരിയ വർധന രേഖപ്പെടുത്തി. കഴിഞ്ഞ മാസം ഇത് 7.7 ശതമാനമായിരുന്നു. ലെത്ത്ബ്രിഡ്ജിലാണ് ഏറ്റവും വലിയ കുതിപ്പ് ഉണ്ടായത്, തൊഴിലില്ലായ്മ നിരക്ക് 6.7 ശതമാനത്തില്‍ നിന്ന് 8.2 ശതമാനമായി ഉയര്‍ന്നു. സെപ്റ്റംബറില്‍ റെഡ് ഡീറില്‍ തൊഴിലില്ലായ്മ നിരക്ക് 7.5 ശതമാനമായി ഉയർന്നു. മുന്‍ മാസം ഇത് 6.7 ശതമാനമായിരുന്നു.
