ടൊറൻ്റോ : ശൈത്യകാല സീസണിന്റെ തുടക്കത്തിൽ തന്നെ അതിശൈത്യ കൊടുങ്കാറ്റ് വീശിയതോടെ കനത്ത മഞ്ഞിൽ മൂടി ഒൻ്റാരിയോ. ഒന്നിലധികം ദിവസങ്ങളിലായി ഉണ്ടായ കൊടുങ്കാറ്റിൽ ഒൻ്റാരിയോയുടെ ചില പ്രദേശങ്ങളിൽ 70 സെന്റീമീറ്ററിലധികം മഞ്ഞുവീഴ്ചയുണ്ടായി. ഹ്യൂറോൺ തടാകത്തിന്റെ കിഴക്കൻ തീരത്തുള്ള പ്രദേശങ്ങളും ജോർജിയൻ ഉൾക്കടലിന് പുറത്തുള്ള പ്രദേശങ്ങളും ഉൾപ്പെടെ തെക്കൻ, തെക്കുപടിഞ്ഞാറൻ ഒൻ്റാരിയോയുടെ ചില ഭാഗങ്ങളിലാണ് ഏറ്റവും കൂടുതൽ മഞ്ഞുവീഴ്ച അനുഭവപ്പെട്ടത്. കനത്ത മഞ്ഞുവീഴ്ചയിൽ ആയിരക്കണക്കിന് ഹൈഡ്രോ വൺ ഉപഭോക്താക്കൾക്ക് വൈദ്യുതി തടസ്സപ്പെട്ടു. ശനിയാഴ്ച രാവിലെ വരെ ജോർജിയൻ ബേ പ്രദേശത്തെ നൂറുകണക്കിന് ആളുകൾ ഇരുട്ടിലാണ്.
ടൊറൻ്റോ ശൈത്യകാല കൊടുങ്കാറ്റിൽ നിന്ന് രക്ഷപ്പെടുമെന്ന് പ്രതീക്ഷിച്ചിരുന്നു. എന്നാൽ, ഗ്രേറ്റർ ടൊറൻ്റോ മേഖലയുടെ പ്രാന്തപ്രദേശങ്ങളും, മിൽട്ടൺ മുതൽ ഓഷവ വരെ, 15 സെന്റീമീറ്ററിലധികം മഞ്ഞുവീഴ്ച ഉണ്ടായി.
