ഓട്ടവ : സാൽമൊണെല്ല മലിനീകരണ സാധ്യതയുള്ളതിനാൽ ഫ്രഷ് ടേസ്റ്റ് പ്രൊഡ്യൂസ് യുവർ ഫ്രഷ് മാർക്കറ്റ് ബ്രാൻഡ് ബ്രോക്ളി ഫ്ലോററ്റ്സ് തിരിച്ചുവിളിച്ചതായി കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) അറിയിച്ചു. ഈ ഉൽപ്പന്നങ്ങൾ 900 ഗ്രാം പാക്കറ്റുകളിലായി ഒൻ്റാരിയോ, കെബെക്ക്, നോവസ്കോഷ എന്നിവയുൾപ്പെടെ ആറു പ്രവിശ്യകളിൽ വിതരണം ചെയ്തിട്ടുണ്ട്. UPC കോഡ് 6 27735 27054 8 ഉം ലോട്ട് # 25318 ഉം ഉപയോഗിച്ച് തിരിച്ചുവിളിച്ച ബ്രോക്ളി ഫ്ലോററ്റ്സ് തിരിച്ചറിയാം. ഇവ ഉപയോഗിക്കരുതെന്നും ഉപേക്ഷിക്കുകയോ വാങ്ങിയ സ്റ്റോറിൽ തിരികെ നൽകുകയോ ചെയ്യണമെന്ന് ഫെഡറൽ ഏജൻസി നിർദ്ദേശിച്ചു. അതേസമയം ബ്രോക്ളി ഫ്ലോററ്റ്സുമായി ബന്ധപ്പെട്ട് ഇതുവരെ ആരും രോഗബാധിതരായി റിപ്പോർട്ട് ചെയ്തിട്ടില്ല.
സാൽമൊണെല്ല കലർന്ന ഭക്ഷണം കേടായതായി കാണപ്പെടുകയോ ചീത്ത മണം ഉണ്ടാവുകയോ ഇല്ല. എന്നാൽ, ഗുരുതരമായ രോഗങ്ങൾക്ക് കാരണമാകും. കൊച്ചുകുട്ടികൾ, ഗർഭിണികൾ, പ്രായമായവർ, രോഗപ്രതിരോധശേഷി കുറഞ്ഞവർ എന്നിവർക്ക് ഗുരുതരവും ചിലപ്പോൾ മാരകവുമായ അണുബാധകൾ പിടിപെടാം. സാൽമൊണെല്ലയുടെ ലക്ഷണങ്ങളിൽ പനി, തലവേദന, ഛർദ്ദി, ഓക്കാനം, വയറുവേദന, വയറിളക്കം എന്നിവ ഉൾപ്പെടുന്നു. തിരിച്ചുവിളിക്കപ്പെട്ട ഉൽപ്പന്നം കഴിച്ച് ആർക്കെങ്കിലും അസുഖം വന്നാൽ, ഉടൻ ആരോഗ്യ പ്രവർത്തകരുമായി ബന്ധപ്പെടണം.
