ഓട്ടവ : കാനഡയിലെ താഴ്ന്ന, ഇടത്തരം വരുമാനക്കാർക്ക് സാമ്പത്തിക സഹായം നൽകുന്നതിനായി ഡിസംബറിൽ കാനഡ റവന്യൂ ഏജൻസി(CRA) നിരവധി ആനുകൂല്യങ്ങൾ വിതരണം ചെയ്യും. വർഷത്തിലെ ഏറ്റവും ചെലവേറിയ മാസങ്ങളിലൊന്നായ ഡിസംബറിൽ കുടുംബങ്ങളെയും, മുതിർന്നവരെയും, ദുർബല വിഭാഗങ്ങളെയും സാമ്പത്തികമായി സ്ഥിരത പുലർത്താൻ സഹായിക്കുന്നതിൽ ഈ പ്രതിമാസ CRA ആനുകൂല്യങ്ങൾ ഒരു പ്രധാന പങ്ക് വഹിക്കുന്നുണ്ട്. ഒൻ്റാരിയോ ട്രിലിയം ബെനിഫിറ്റ് (OTB), കാനഡ ചൈൽഡ് ബെനിഫിറ്റ് (സിസിബി), കാനഡ പെൻഷൻ പ്ലാൻ (സിപിപി) എന്നിവയാണ് ഡിസംബറിൽ വിതരണം ചെയ്യുന്ന CRA ആനുകൂല്യങ്ങൾ.
ഒൻ്റാരിയോ ട്രിലിയം ബെനിഫിറ്റ് (OTB)
നികുതി, ഊർജ്ജ ബില്ലുകൾ, ഭവന നികുതികൾ തുടങ്ങിയ പതിവ് ചെലവുകളെ മറികടക്കാൻ ജനങ്ങളെ സഹായിക്കുന്ന ഒൻ്റാരിയോ ട്രിലിയം ബെനിഫിറ്റ് ഡിസംബർ 10-ന് വിതരണം ചെയ്യും. ഒൻ്റാരിയോ സെയിൽസ് ടാക്സ് ക്രെഡിറ്റ് (OSTC), നോർത്തേൺ ഒൻ്റാരിയോ എനർജി ക്രെഡിറ്റ് (NOEC), ഒൻ്റാരിയോ എനർജി ആൻഡ് പ്രോപ്പർട്ടി ടാക്സ് ക്രെഡിറ്റുകൾ (OEPTC) എന്നീ മൂന്ന് ക്രെഡിറ്റുകൾ കൂടിച്ചേരുന്നതാണ് OTB. ഒരു വ്യക്തിക്ക് അവരുടെ പ്രായം, വരുമാനം, താമസിക്കുന്ന സ്ഥലം, കുടുംബങ്ങളുടെ എണ്ണം, വാടകയ്ക്കോ വസ്തുനികുതിയിലോ അടച്ച തുക എന്നിവയെ ആശ്രയിച്ചാണ് ഒൻ്റാരിയോ ട്രില്ലിയം ബെനിഫിറ്റ് കണക്കാക്കുക. എന്നാൽ, ഒരു വ്യക്തിക്കോ കുടുംബത്തിനോ നൽകുന്ന OTB വാർഷിക പേയ്മെൻ്റ് 371 ഡോളറോ അതിൽ കുറവോ ആണെങ്കിൽ ഒറ്റത്തവണയായി പേയ്മെൻ്റ് വിതരണം ചെയ്യാറുണ്ട്. ഇത് സാധാരണ ജൂലൈ മാസത്തിലാണ് വിതരണം ചെയ്യുക. 2026 ജനുവരി 9, 2026 ഫെബ്രുവരി 10, 2026 മാർച്ച് 10, 2026 ഏപ്രിൽ 10, 2026 മെയ് 8, 2026 ജൂൺ 10, 2026 ജൂലൈ 10, 2026 ഓഗസ്റ്റ് 10, 2026 സെപ്റ്റംബർ 10, 2026 ഒക്ടോബർ 9, 2026 നവംബർ 10, 2026 ഡിസംബർ 10 എന്നീ തീയതികളിലായിരിക്കും ഇനി ഒൻ്റാരിയോ ട്രിലിയം ബെനിഫിറ്റ് വിതരണം ചെയ്യുന്നത്.
കാനഡ ചൈൽഡ് ബെനിഫിറ്റ് (സിസിബി)
18 വയസ്സിന് താഴെയുള്ള കുട്ടികളുള്ള കുടുംബങ്ങളെ സഹായിക്കുന്നതിന് രൂപം നൽകിയിട്ടുള്ളതാണ് കാനഡ ചൈൽഡ് ബെനിഫിറ്റ്. ഡിസംബർ 11 വ്യാഴാഴ്ച ആയിരിക്കും കാനഡ ചൈൽഡ് ബെനിഫിറ്റ് വിതരണം ചെയ്യുക. അപേക്ഷകരുടെ വരുമാനവും കുട്ടികളുടെ പ്രായവും അനുസരിച്ചായിരിക്കും തുക അനുവദിക്കുക. 2025 ജൂലൈയിൽ കാനഡ ചൈൽഡ് ബെനിഫിറ്റ് തുക ഏകദേശം 2.7% വർധിപ്പിച്ചിരുന്നു. ഇതോടെ ആറ് വയസ്സിന് താഴെയുള്ള കുട്ടികൾക്കുള്ള പരമാവധി വാർഷിക ആനുകൂല്യം ഇപ്പോൾ ഒരു കുട്ടിക്ക് 7,997 ഡോളർ ആണ്. അതേസമയം ആറ് മുതൽ 17 വയസ്സ് വരെ പ്രായമുള്ള കുട്ടികൾക്ക് പരമാവധി ആനുകൂല്യം ഒരു കുട്ടിക്ക് 6,748 ഡോളർ ആയിരിക്കും ലഭിക്കുക. 2026 ജനുവരി 20, ഫെബ്രുവരി 20, മാർച്ച് 20, ഏപ്രിൽ 20, മെയ് 20, ജൂൺ 19, ജൂലൈ 20, ഓഗസ്റ്റ് 20, സെപ്റ്റംബർ 18, ഒക്ടോബർ 20, നവംബർ 20, ഡിസംബർ 11 ഈ
തീയതികളിലാണ് ഇനി കാനഡ ചൈൽഡ് ബെനിഫിറ്റ് വിതരണം ചെയ്യുക.
കാനഡ പെൻഷൻ പ്ലാൻ (CPP)
വിരമിക്കുമ്പോൾ വരുമാനവും വൈകല്യമോ മരണമോ ഉണ്ടായാൽ ആനുകൂല്യങ്ങളും നൽകുന്നതിന് രൂപകൽപ്പന ചെയ്ത ഒരു രാജ്യവ്യാപക സോഷ്യൽ ഇൻഷുറൻസ് പ്രോഗ്രാമാണ് കാനഡ പെൻഷൻ പ്ലാൻ. ഡിസംബർ 20 (വെള്ളി)യാണ് ഇനി കാനഡ പെൻഷൻ പ്ലാൻ വിതരണം ചെയ്യുക. 65 വയസ്സിന് മുകളിലുള്ള താമസക്കാർക്ക് പരമാവധി 1,433 ഡോളർ പ്രതിമാസ പേയ്മെൻ്റിന് അർഹതയുണ്ട്. ഇത്തവണത്തെ സിപിപി പേയ്മെൻ്റിൽ 2.7% വർധനയും വാർദ്ധക്യ സുരക്ഷ (OAS), ഗ്യാരണ്ടീഡ് ഇൻകം സപ്ലിമെൻ്റ് (GIS) പോലുള്ള അധിക ആനുകൂല്യങ്ങളും ഉൾപ്പെടുന്നു. 2026 ജനുവരി 28, ഫെബ്രുവരി 25, മാർച്ച് 27, ഏപ്രിൽ 28, മെയ് 27, ജൂൺ 26, ജൂലൈ 29, ഓഗസ്റ്റ് 27, സെപ്റ്റംബർ 25, ഒക്ടോബർ 28, നവംബർ 26, ഡിസംബർ 22 തീയതികളിലാണ് അടുത്ത വർഷം കാനഡ പെൻഷൻ പ്ലാൻ വിതരണം ചെയ്യുന്നത്. കൂടുതൽ വിവരങ്ങൾക്ക്, കാനഡ സർക്കാരിന്റെ CPP പേജ് സന്ദർശിക്കുക അല്ലെങ്കിൽ My Service Canada അക്കൗണ്ടിൽ ലോഗിൻ ചെയ്യുക.
