ഓട്ടവ : കാനഡയിലെ ഇന്ത്യൻ വംശജർക്ക് ആശ്വാസമായി ‘പേഴ്സൺ ഓഫ് ഇന്ത്യൻ ഒറിജിൻ’ (PIO) കാർഡുകൾ ‘ഓവർസീസ് സിറ്റിസൺഷിപ്പ് ഓഫ് ഇന്ത്യ’ (OCI) കാർഡുകളിലേക്ക് മാറ്റുന്നതിനുള്ള സമയപരിധി നീട്ടി ഇന്ത്യ. ഡിസംബർ 31 വരെ PIO കാർഡ് ഉടമകൾക്ക് വിദേശ പാസ്പോർട്ടിനൊപ്പം OCI കാർഡുകൾ യാത്രാരേഖയായി ഉപയോഗിക്കാം. എന്നാൽ, വിദേശ യാത്രയിലെ തടസ്സങ്ങൾ ഒഴിവാക്കാൻ എല്ലാവരും എത്രയും പെട്ടെന്ന് OCI കാർഡിലേക്ക് മാറണമെന്ന് ഇന്ത്യൻ ഹൈക്കമ്മിഷൻ നിർദ്ദേശിച്ചു. OCI കാർഡിലേക്ക് മാറുന്നതിന് VFS Global വഴിയാണ് കാനഡയിലെ ഇന്ത്യൻ എംബസികളിൽ അപേക്ഷ സമർപ്പിക്കേണ്ടത്.
PIO കാർഡുകൾക്ക് ഇനി സാധുതയില്ലാത്തതിനാൽ OCI കാർഡിലേക്ക് മാറേണ്ടത് അനിവാര്യമാണ്. ഇൻ്റർനാഷണൽ സിവിൽ ഏവിയേഷൻ ഓർഗനൈസേഷൻ (ICAO) മാനദണ്ഡങ്ങൾ അനുസരിച്ച് PIO കാർഡുകൾ അസാധുവാകും. OCI കാർഡ് ഉപയോഗിക്കുന്നതിലൂടെ ഇന്ത്യയിലേക്ക് ആജീവനാന്ത വീസ, എളുപ്പത്തിലുള്ള ഇമിഗ്രേഷൻ ക്ലിയറൻസ്, സാമ്പത്തിക ഇടപാടുകൾക്കുള്ള സൗകര്യം എന്നിവ ലഭിക്കും.
ഓവർസീസ് സിറ്റിസൺസ് ഓഫ് ഇന്ത്യ (OCI)
2005 ഓഗസ്റ്റിൽ ആരംഭിച്ച OCI പദ്ധതി, വിദേശത്തുള്ള ഇന്ത്യൻ വംശജർക്ക് വീസ ഇല്ലാതെ ഇന്ത്യ സന്ദർശിക്കാനുള്ള അനുമതി നൽകുന്നു. 1950 ജനുവരി 26-ന് ഇന്ത്യയിലെ പൗരന്മാരായിരുന്നവർക്കും അതിന് ശേഷം പൗരത്വം നേടാൻ അർഹതയുള്ളവരോ ആയവർക്ക് OCI കാർഡിന് രജിസ്റ്റർ ചെയ്യാം. എന്നാൽ പാകിസ്ഥാൻ, ബംഗ്ലാദേശ് എന്നീ രാജ്യങ്ങളിലെ പൗരന്മാർക്കും മറ്റു ചില രാജ്യങ്ങളിലെ പൗരന്മാർക്കും ഇത് ലഭ്യമല്ല.
