വാഷിങ്ടൺ : കാനഡയുമായുള്ള വ്യാപാര ചർച്ചകൾ പുനഃരാരംഭിക്കുന്നതിൽ വ്യക്തതയില്ലാതെ യുഎസ് പ്രസിഡന്റ് ഡോണൾഡ് ട്രംപ്. ഈ വർഷം ആദ്യം കാനഡയുമായി നിർത്തിവച്ച വ്യാപാര ചർച്ചകൾ പുനഃരാരംഭിക്കുമോ എന്ന മാധ്യമ പ്രവർത്തകരുടെ ചോദ്യത്തിന് ‘ നമുക്ക് നോക്കാം’ എന്നായിരുന്നു അദ്ദേഹത്തിന്റെ മറുപടി. കെന്നഡി സെന്റർ ഓണേഴ്സ് ഗാലയ്ക്ക് പുറത്ത് മാധ്യമപ്രവർത്തകരോട് സംസാരിച്ച ട്രംപ്, കനേഡിയൻ പ്രധാനമന്ത്രി മാർക്ക് കാർണിയുമായി മികച്ച ബന്ധമാണെന്നും അദ്ദേഹം പറഞ്ഞു.
വെള്ളിയാഴ്ച ഫിഫ ലോകകപ്പ് നറുക്കെടുപ്പിനിടെ മാർക്ക് കാർണി, മെക്സിക്കൻ പ്രസിഡന്റ് ക്ലോഡിയ ഷെയ്ൻബോം എന്നിവരുമായി ട്രംപ് അടച്ചിട്ട മുറിയിൽ കൂടിക്കാഴ്ച നടത്തിയിരുന്നു. കൂടിക്കാഴ്ചയുടെ വിശദാംശങ്ങൾ വൈറ്റ് ഹൗസ് പുറത്തുവിട്ടിരുന്നില്ല. ഒൻ്റാരിയോ സർക്കാരിന്റെ താരിഫ് വിരുദ്ധ പരസ്യം കാരണം കഴിഞ്ഞ മാസം കാനഡയുമായുള്ള വ്യാപാര ചർച്ചകൾ ട്രംപ് അവസാനിപ്പിച്ചിരുന്നു.
