ഹാലിഫാക്സ്: ഡാർട്ട്മൗത്തിലെ വേവർലി റോഡിൽ ശനിയാഴ്ച തകരാറിലായ പ്രധാന ജലവിതരണ പൈപ്പിന്റെ (Water Main) അറ്റകുറ്റപ്പണി പൂർത്തിയാക്കിയതായി ഹാലിഫാക്സ് വാട്ടർ അറിയിച്ചു. അതേസമയം അടുത്ത അറിയിപ്പ് ഉണ്ടാകുന്നതുവരെ പ്രദേശത്തെ ആളുകൾ തിളപ്പിച്ചാറ്റിയ വെള്ളം ഉപയോഗിക്കാനുള്ള നിർദ്ദേശം (Boil-Water Order) കർശനമായി പാലിക്കണമെന്നും അധികൃതർ കൂട്ടിച്ചേർത്തു. ശനിയാഴ്ച രാത്രിയോടെയാണ് തകരാറിലായ പൈപ്പിന്റെ അറ്റകുറ്റപ്പണി ആരംഭിച്ചത്.
ഹാലിഫാക്സ് വാട്ടറിന്റെ കണക്കനുസരിച്ച്, ഏകദേശം 2,000 ഉപഭോക്താക്കൾ ഈ നിർദ്ദേശത്തിന് കീഴിലാണ്. വേവർലി റോഡ്, സ്പൈഡർ ലേക്ക്, മാണ്ടഗ്യു റോഡ്, കീസ്റ്റോൺ വില്ലേജ്, പോർട്ട് വാലസ്, മാണ്ടബെല്ലോ, ക്രെയ്ഗ് വുഡ് എസ്റ്റേറ്റ്സ്, അവന്യൂ ഡു പോർട്ടേജ് എന്നീ സമീപ പ്രദേശങ്ങളിലുള്ള ആളുകളെയാണ് ഇത് ബാധിക്കുന്നത്. ജലവിതരണം നിലച്ചതിനെത്തുടർന്ന് ബുദ്ധിമുട്ടിലായ താമസക്കാർക്കായി ഹാലിഫാക്സ് റീജിയണൽ മുനിസിപ്പാലിറ്റി ഞായറാഴ്ച ഈസ്റ്റ് ഡാർട്ട്മൗത്ത് കമ്മ്യൂണിറ്റി സെന്ററിൽ ഉച്ചതിരിഞ്ഞ് 2:30 മുതൽ രാത്രി 8 മണി വരെ ഒരു കൺഫർട്ട് സെന്റർ (Comfort Centre) തുറന്നിരുന്നു.
പ്രധാന പൈപ്പ് പൊട്ടിയതിന്റെ കൃത്യമായ കാരണം ഇതുവരെ വ്യക്തമായിട്ടില്ലെന്ന് ജലവിതരണ യൂട്ടിലിറ്റിയുടെ വക്താവ് ഇമെയിൽ വഴി അറിയിച്ചു. പൈപ്പിന്റെ നിർമ്മാണ വസ്തു, പഴക്കം, മണ്ണിന്റെ രാസഘടന, മഞ്ഞുവീഴ്ചയുടെയും താപനിലയുടെയും ഫലങ്ങൾ തുടങ്ങിയ ഘടകങ്ങൾ തകരാറിന് കാരണമായേക്കാം എന്നും അവർ ചൂണ്ടിക്കാട്ടി.കുടിവെള്ളം, പാചകം, കുഞ്ഞുങ്ങൾക്കുള്ള ഫോർമുല തയ്യാറാക്കൽ, പഴങ്ങളും പച്ചക്കറികളും കഴുകൽ, പല്ലുതേക്കൽ എന്നിവയ്ക്ക് ഉപയോഗിക്കുന്ന വെള്ളം കുറഞ്ഞത് ഒരു മിനിറ്റെങ്കിലും തിളപ്പിച്ചാറ്റണം. വെള്ളത്തിന് നിറം മാറ്റമുണ്ടെങ്കിൽ, തെളിയുന്നത് വരെ ടാപ്പ് തുറന്നുവിട്ട് വെള്ളം കളയണമെന്നും അധികൃതർ നിർദ്ദേശിച്ചു.
