ഓട്ടവ : സമ്പദ്വ്യവസ്ഥയെയും തൊഴിൽ വിപണിയെയും കുറിച്ചുള്ള നിരവധി പോസിറ്റീവ് റിപ്പോർട്ടുകൾക്ക് ശേഷം, സെൻട്രൽ ബാങ്ക് അടിസ്ഥാന പലിശ നിരക്ക് 2.25 ശതമാനമായി നിലനിർത്തി. ഈ വർഷത്തെ അന്തിമ പലിശ നിരക്ക് പ്രഖ്യാപനത്തിൽ മൊത്തത്തിലുള്ള പണപ്പെരുപ്പം ഏകദേശം 2.5 ശതമാനത്തിൽ തുടരുന്നതിനാൽ, പലിശനിരക്ക് നിലനിർത്താനാണ് സാധ്യതയെന്ന് സാമ്പത്തിക വിദഗ്ദ്ധർ പ്രവചിച്ചിരുന്നു.
2.4% ആയി ഉയർന്ന പണപ്പെരുപ്പവും, 7.1% എന്ന ഉയർന്ന തൊഴിലില്ലായ്മ നിരക്കും അടക്കമുള്ള സാമ്പത്തിക ദുർബലതകൾ പരിഹരിക്കാൻ സെപ്റ്റംബറിൽ ബാങ്ക് ഓഫ് കാനഡ പലിശനിരക്ക് 2.75 ൽ നിന്ന് 2.5 ശതമാനമായി കുറച്ചിരുന്നു. മാർച്ച് മുതൽ തുടർച്ചയായി മൂന്ന് തവണ നിരക്ക് നിലനിർത്തിയതിന് ശേഷമാണ് വെട്ടിക്കുറക്കൽ ഉണ്ടായത്. തുടർന്ന് ഒക്ടോബറിൽ സെൻട്രൽ ബാങ്ക് പ്രധാന പലിശ നിരക്ക് 2.5 ശതമാനത്തിൽ നിന്ന് 2.25 ശതമാനമായി കുറച്ചു. കഴിഞ്ഞ രണ്ട് തവണത്തെ ഉൾപ്പെടെ, ഈ വർഷം ഇതുവരെ ബാങ്ക് ഓഫ് കാനഡ നാല് നിരക്ക് കുറയ്ക്കലുകൾ നടത്തിയിട്ടുണ്ട്. സെപ്റ്റംബറിലും ഒക്ടോബറിലും നിരക്കുകൾ കുറയ്ക്കുന്നതിന് മുമ്പ്, വ്യാപാര യുദ്ധത്തെയും യുഎസ് താരിഫുകളെയും ചുറ്റിപ്പറ്റിയുള്ള അനിശ്ചിതത്വം കാരണം, തുടർച്ചയായ മൂന്ന് തവണ സെൻട്രൽ ബാങ്ക് പ്രധാന പോളിസി നിരക്ക് 2.75 ശതമാനത്തിൽ നിലനിർത്തിയിരുന്നു.
