ടൊറന്റോ: ക്രിസ്മസ് തലേന്ന് നോർത്ത് യോർക്കിലുണ്ടായ വാഹനാപകടത്തിൽ ഒരാൾ മരിക്കുകയും നാല് പേർക്ക് പരിക്കേൽക്കുകയും ചെയ്തു. ഡഫറിൻ സ്ട്രീറ്റിനും ഫിഞ്ച് അവന്യൂ വെസ്റ്റിനും സമീപമുള്ള ഒരു കെട്ടിടത്തിലേക്കാണ് നിയന്ത്രണം വിട്ട കാർ ഇടിച്ചു കയറിയത്. കെട്ടിടത്തിനുള്ളിൽ നിൽക്കുകയായിരുന്ന ഒരു പുരുഷനാണ് അപകടത്തിൽ മരിച്ചത്. ആളെ തിരിച്ചറിഞ്ഞിട്ടില്ല. കാർ കെട്ടിടത്തിന്റെ മുൻഭാഗം തകർത്ത് ഉള്ളിലേക്ക് ഇടിച്ച് കയറിയപ്പോൾ ഇയാൾ വാഹനത്തിനും കെട്ടിടത്തിനുമിടയിൽ കുടുങ്ങിപ്പോവുകയായിരുന്നു. ഫയർഫോഴ്സും പാരാമെഡിക്കൽ വിഭാഗവും ചേർന്ന് ഏറെ പരിശ്രമിച്ചാണ് ഇയാളെ പുറത്തെടുത്തതെങ്കിലും സംഭവസ്ഥലത്ത് വെച്ച് തന്നെ മരണം സ്ഥിരീകരിച്ചു.
കാർ ഇടിക്കുമ്പോൾ കെട്ടിടത്തിന് സമീപം നിന്നിരുന്ന രണ്ട് സ്ത്രീകൾക്ക് ഗുരുതരമായി പരിക്കേറ്റു. കാറിലുണ്ടായിരുന്ന ഡ്രൈവർക്കും യാത്രക്കാരനും നിസ്സാര പരിക്കുകളുണ്ട്. ഇവരെല്ലാവരും ആശുപത്രിയിൽ ചികിത്സയിലാണ്. ഡ്രൈവർക്ക് വാഹനത്തിന്റെ നിയന്ത്രണം നഷ്ടപ്പെട്ടതാണ് അപകടത്തിന് കാരണമെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. അപകടം നടക്കുമ്പോൾ ഡ്രൈവർ മദ്യപിച്ചിരുന്നോ അല്ലെങ്കിൽ അമിതവേഗതയിലായിരുന്നോ എന്ന കാര്യം പോലീസ് അന്വേഷിച്ചു വരികയാണ്. സംഭവത്തിൽ ടൊറന്റോ പോലീസ് അന്വേഷണം തുടരുകയാണ്. അപകടം നടന്ന സ്ഥലത്തെ സിസിടിവി ദൃശ്യങ്ങൾ ശേഖരിച്ച് വരികയാണെന്ന് ഇൻസ്പെക്ടർ ജോൺ റോസ് അറിയിച്ചു.
