എഡ്മിന്റൻ: കാനഡയിൽ നിന്ന് വേർപിരിഞ്ഞ് ആൽബർട്ട ഒരു സ്വതന്ത്ര രാഷ്ട്രമാകണമോ എന്ന കാര്യത്തിൽ ജനഹിതം അറിയാനുള്ള നീക്കങ്ങൾക്ക് ഔദ്യോഗിക തുടക്കം. ഇതിനായി ഒപ്പുകൾ ശേഖരിക്കാൻ ‘ആൽബർട്ട പ്രോസ്പരിറ്റി പ്രോജക്റ്റ്’ എന്ന സംഘടനയ്ക്ക് ഇലക്ഷൻ ആൽബർട്ട അനുമതി നൽകി. ശനിയാഴ്ച മുതൽ പ്രവിശ്യയിലുടനീളം ജനങ്ങൾക്കിടയിൽ പോയി ഒപ്പുശേഖരണം നടത്താനാണ് സംഘടനയുടെ തീരുമാനം.
ഈ ഹിതപരിശോധന യാഥാർത്ഥ്യമാകണമെങ്കിൽ മെയ് 2-നുള്ളിൽ ഏകദേശം 1,77,732 ഒപ്പുകളെങ്കിലും സംഘടന ശേഖരിക്കേണ്ടതുണ്ട്. കഴിഞ്ഞ തിരഞ്ഞെടുപ്പിൽ വോട്ട് ചെയ്തവരുടെ പത്ത് ശതമാനം വോട്ടർമാരുടെയെങ്കിലും പിന്തുണ ഇതിനായി ആവശ്യമാണ്. നേരത്തെ നൽകിയ അപേക്ഷയിൽ ചില നിയമപരമായ തടസ്സങ്ങൾ ഉണ്ടായിരുന്നെങ്കിലും, ചോദ്യത്തിൽ മാറ്റം വരുത്തിയതോടെയാണ് ഇപ്പോൾ അനുമതി ലഭിച്ചത്. ആവശ്യമായ ഒപ്പുകൾ ലഭിക്കുകയാണെങ്കിൽ, പ്രവിശ്യയുടെ ഭാവി തീരുമാനിക്കുന്ന നിർണ്ണായകമായ ഒരു ഹിതപരിശോധനയിലേക്ക് കാര്യങ്ങൾ നീങ്ങുമെന്നാണ് കണ്ടെത്തൽ. ഇത് കാനഡയുടെ രാഷ്ട്രീയ ഭൂപടത്തിൽ വലിയ മാറ്റങ്ങൾക്ക് വഴിതുറന്നേക്കാം.
