ഓട്ടവ: കാനഡയിൽ പ്രമേഹത്തിനും അമിതവണ്ണത്തിനുമുള്ള ‘ഓസെംപിക്’ (Ozempic) മരുന്നിന്റെ വില കുറഞ്ഞ ജനറിക് പതിപ്പുകൾക്ക് അനുമതി. അടുത്ത ആഴ്ച മുതൽ ഇത്തരം കമ്പനികൾക്ക് മരുന്ന് നിർമ്മിക്കാൻ അനുമതി ലഭിക്കുമെങ്കിലും, ഇവ വിപണിയിൽ എത്താൻ കുറച്ചു മാസങ്ങൾ കൂടി കാത്തിരിക്കേണ്ടി വരുമെന്ന് ആരോഗ്യ വിദഗ്ധർ അറിയിച്ചു. നിലവിൽ ഒൻപതോളം കമ്പനികൾ ഈ മരുന്ന് നിർമ്മിക്കാനുള്ള അനുമതിക്കായി സർക്കാരിനെ സമീപിച്ചിട്ടുണ്ട്.
നിലവിൽ ഓസെംപിക് മരുന്നിന് വലിയ വിലയാണ് രോഗികൾ നൽകുന്നത്. പുതിയ ജനറിക് മരുന്നുകൾ എത്തുന്നതോടെ വിലയിൽ 35 ശതമാനത്തോളം കുറവുണ്ടാകുമെന്ന് വിദഗ്ധർ അഭിപ്രായപ്പെട്ടു. മരുന്നിന്റെ ഗുണനിലവാരവും സുരക്ഷിതത്വവും ഉറപ്പുവരുത്താൻ കർശനമായ പരിശോധനകൾ ആവശ്യമായതിനാലാണ് ഇത് ലഭ്യമാകാൻ വൈകുന്നത്. 2026 പകുതിയോടെ മാത്രമേ സാധാരണക്കാർക്ക് ഈ മരുന്ന് കടകളിൽ നിന്ന് വാങ്ങാൻ സാധിക്കൂ.
വിലക്കൂടുതൽ കാരണം ഓസെംപിക് വാങ്ങാൻ കഴിയാതിരുന്ന ലക്ഷക്കണക്കിന് ആളുകൾക്ക് വലിയ ആശ്വാസമാകുമെന്നാണ് കണ്ടെത്തൽ. കാനഡയിൽ മാത്രമാണ് നോവോ നോർഡിസ്ക് എന്ന കമ്പനി ഈ മരുന്നിന്റെ പേറ്റന്റ് കാലാവധി തീരാൻ അനുവദിച്ചത്. ഇതോടെ സാധാരണക്കാർക്ക് താങ്ങാനാവുന്ന വിലയിൽ മികച്ച ചികിത്സ ഉറപ്പാക്കാൻ കഴിയുമെന്നാണ് ഡോക്ടർമാരുടെ പ്രതീക്ഷ.
