മൺട്രിയോൾ : കെബെക്കിലെ ഫസ്റ്റ് നേഷൻ ജനതയുടെ ആരോഗ്യ സംരക്ഷണം പ്രതിസന്ധിയിലാണെന്ന മുന്നറിയിപ്പുമായി ആരോഗ്യ പ്രവർത്തകർ. വിൻസ് കമ്മീഷൻ (Viens Commission) മുന്നോട്ടുവെച്ച ശുപാർശകൾ നടപ്പിലാക്കുന്നതിലുണ്ടായ കാലതാമസവും ഫണ്ടിങ്ങിലെ അനിശ്ചിതത്വവുമാണ് ഈ മേഖലയെ തളർത്തുന്നതെന്നാണ് റിപ്പോർട്ട്. പല ഗോത്രവർഗ്ഗ മേഖലകളിലും ആംബുലൻസ് എത്താൻ ഇപ്പോഴും 60 മുതൽ 90 മിനിറ്റ് വരെ സമയമെടുക്കുന്നുണ്ടെന്നും, ഇത് ഒഴിവാക്കാവുന്ന മരണങ്ങൾക്കും രോഗാവസ്ഥ വഷളാകുന്നതിനും കാരണമാകുന്നുണ്ടെന്നും ഫസ്റ്റ് നേഷൻസ് പാരാമെഡിക്സ് ഡയറക്ടർ റോബർട്ട് ബോൺസ്പീൽ ചൂണ്ടിക്കാട്ടി.
കെബെക്കിലെ 52 ഫസ്റ്റ് നേഷൻ കമ്മ്യൂണിറ്റികളിൽ ഇപ്പോഴും സ്വന്തമായി ആംബുലൻസ് സേവനങ്ങളില്ല. ഇവർ നിലവിൽ പൊലീസിനെയോ നേഴ്സിങ് സ്റ്റേഷനുകളെയോ ആണ് ആശ്രയിക്കുന്നത്. ബജറ്റ് നിയന്ത്രണങ്ങൾ മൂലം ആരോഗ്യമേഖലയിലെ പരിഷ്കാരങ്ങൾ പാതിവഴിയിൽ നിലയ്ക്കാൻ സാധ്യതയുണ്ടെന്ന് കെബെക്ക് ഓംബുഡ്സ്മാൻ പുറത്തുവിട്ട പുതിയ റിപ്പോർട്ട് മുന്നറിയിപ്പ് നൽകുന്നു. അടിയന്തര സാഹചര്യങ്ങളിൽ പാരാമെഡിക്സ് എത്തുന്നതിന് മുൻപ് പ്രാഥമിക ചികിത്സ നൽകാൻ ലക്ഷ്യമിട്ടുള്ള ‘PRECA’ പോലുള്ള പദ്ധതികൾ ഫണ്ടിങ് വൈകുന്നത് മൂലം നടപ്പിലാക്കാൻ കഴിയാത്തത് രോഗികളുടെ ജീവൻ അപകടത്തിലാക്കുന്നതായും ആരോഗ്യ പ്രവർത്തകർ കുറ്റപ്പെടുത്തി.
