ഓട്ടവ: വെനസ്വേലയിലെ എണ്ണ സമ്പദ്വ്യവസ്ഥയിൽ മാറ്റങ്ങൾ കൊണ്ടുവരാനുള്ള യുഎസ് പ്രസിഡന്റ് ഡോണൾഡ് ട്രംപിന്റെ താൽപ്പര്യം കാനഡയുടെ എണ്ണ-വാതക മേഖലയ്ക്ക് ഒരു മുന്നറിയിപ്പാണെന്ന് രാഷ്ട്രീയ നിരീക്ഷകർ. കാനഡ എപ്പോഴും മറ്റ് എണ്ണ സമ്പന്ന രാജ്യങ്ങളുമായി മത്സരിച്ചാണ് മുന്നോട്ട് പോയിട്ടുള്ളതെന്നും അതിനാൽ നിലവിലെ സാഹചര്യത്തിൽ പരിഭ്രാന്തരാകാതെ വിപണിയിൽ മത്സരക്ഷമത നിലനിർത്താനാണ് കാനഡ ശ്രമിക്കേണ്ടതെന്നും മക്ഡൊണൾഡ്-ലോറിയർ ഇൻസ്റ്റിറ്റ്യൂട്ടിലെ ഊർജ്ജ വിഭാഗം ഡയറക്ടർ ഹീതർ എക്സ്നർ-പിറോട്ട് പറഞ്ഞു.
അതേസമയം, വെനസ്വേലയിൽ യുഎസ് നേരിട്ട് ഭരണം നടത്തില്ലെന്നും നിലവിലുള്ള എണ്ണ ഉപരോധം നടപ്പിലാക്കുക മാത്രമാണ് ചെയ്യുകയെന്നും യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കിയത് ട്രംപിന്റെ മുൻ പ്രസ്താവനകളെ വെറും ഭീഷണികളായി മാത്രം കാണാൻ പ്രേരിപ്പിക്കുന്നതാണെന്നും ഹീതർ പറയുന്നു. വെനസ്വേലൻ എണ്ണയിൽ നിന്ന് ലാഭമുണ്ടാക്കുന്നതിനോ കാനഡയുടെ എണ്ണ മേഖലയെ ബാധിക്കുന്ന തരത്തിലുള്ള മാറ്റങ്ങൾ കൊണ്ടുവരുന്നതിനോ മുൻപായി ട്രംപിന് തന്റെ നടപടികൾ മൂലം ഉടലെടുത്ത ആഗോള രാഷ്ട്രീയ അസ്ഥിരതകൾ പരിഹരിക്കേണ്ടതുണ്ടെന്നും ഹീതർ കൂട്ടിച്ചേർത്തു. എങ്കിലും ദീർഘകാലാടിസ്ഥാനത്തിൽ വെനിസ്വേല തങ്ങളുടെ എണ്ണ വിപണി അമേരിക്കയ്ക്ക് അനുകൂലമായി പുനർനിർമ്മിക്കാൻ സാധ്യതയുണ്ടെന്നും അവർ മുന്നറിയിപ്പ് നൽകി.
ഈ സാഹചര്യത്തിൽ പ്രധാനമന്ത്രി മാർക്ക് കാർണിയും ആൽബർട്ട പ്രീമിയർ ഡാനിയേൽ സ്മിത്തും സ്വീകരിക്കുന്ന നടപടികൾ ശരിയായ ദിശയിലാണെന്ന് വിലയിരുത്തപ്പെടുന്നു. കനേഡിയൻ എണ്ണയ്ക്കായി പുതിയ വിപണികൾ കണ്ടെത്താനും ഈ മേഖലയെ വൈവിധ്യവൽക്കരിക്കാനും അവർ നടത്തുന്ന ശ്രമങ്ങൾ കാനഡയുടെ വിപണി മൂല്യം നിലനിർത്താൻ സഹായിക്കും. വിദേശ വിപണികളിലെ വെല്ലുവിളികൾ നേരിട്ട് കാനഡ മത്സരരംഗത്ത് ഉറച്ചുനിൽക്കുന്നുണ്ടെന്ന് ഉറപ്പാക്കാൻ അടുത്തിടെ ഇരുവരും നടത്തിയ നീക്കങ്ങൾ നിർണ്ണായകമാണെന്നും റിപ്പോർട്ടുകൾ സൂചിപ്പിക്കുന്നു.
