കൊച്ചി: ബലാത്സംഗക്കേസില് രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ ഹൈക്കോടതി ഇന്ന് പരിഗണിക്കും. മുന്കൂര് ജാമ്യാപേക്ഷയെ എതിര്ത്ത് കക്ഷി ചേരാനുള്ള അതിജീവിതയുടെ അപേക്ഷയും സിംഗിള് ബെഞ്ച് പരിഗണിക്കും. ജസ്റ്റിസ് എ.ബദറുദ്ദീന് അധ്യക്ഷനായ സിംഗിള് ബെഞ്ച് ആണ് വാദം കേൾക്കുന്നത്.
രാഹുലിന്റെ മുന്കൂര് ജാമ്യാപേക്ഷയെ എതിര്ത്ത് പ്രത്യേക അന്വേഷണ സംഘം ഹൈക്കോടതിയില് റിപ്പോര്ട്ട് നല്കും.എസ്ഐടി രജിസ്റ്റര് ചെയ്ത ആദ്യ കേസിലെ മുന്കൂര് ജാമ്യാപേക്ഷ നേരത്തെ തിരുവനന്തപുരം പ്രിന്സിപ്പല് സെഷന്സ് കോടതി തള്ളിയിരുന്നു. തുടര്ന്നാണ് മുന്കൂര് ജാമ്യം തേടി രാഹുല് മാങ്കൂട്ടത്തില് ഹൈക്കോടതിയെ സമീപിച്ചത്. മുന്കൂര് ജാമ്യാപേക്ഷയില് അന്തിമ തീരുമാനം എടുക്കുംവരെ രാഹുല് മാങ്കൂട്ടത്തിലിന്റെ അറസ്റ്റ് ഹൈക്കോടതി തടഞ്ഞിരുന്നു.
ബലാത്സംഗം, വിവാഹ വാഗ്ദാനം നല്കി പീഡനം, ഗര്ഭഛിദ്രത്തിന് പ്രേരിപ്പിക്കല്, വീട്ടില് അതിക്രമിച്ചുകയറല് തുടങ്ങിയ വകുപ്പുകളാണ് രാഹുലിനെതിരെ ചുമത്തിയിട്ടുള്ളത്. ബലാത്സംഗക്കേസില് രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷയെ എതിര്ത്ത് പരാതിക്കാരിയും ഹൈക്കോടതിയില് ഹര്ജി നല്കിയിട്ടുണ്ട്. കേസിൽ തന്നെയും കക്ഷിചേർക്കണമെന്നും തന്റെ ഭാഗം കൂടി കേൾക്കണമെന്നും ആവശ്യപ്പെട്ട് അതിജീവിതയും കോടതിയെ സമീപിച്ചിട്ടുണ്ട്. താൻ കടുത്ത സൈബർ ആക്രമണം നേരിടുകയാണെന്ന് പരാതിക്കാരി ആരോപിച്ചു.
