ഓട്ടവ : സാൽമൊണെല്ല അണുബാധ സാധ്യതയെ തുടർന്ന് കാനഡയിൽ നിരവധി പിസ്ത ഉൽപ്പന്നങ്ങൾ വീണ്ടും തിരിച്ചുവിളിച്ചതായി കനേഡിയൻ ഫുഡ് ഇൻസ്പെക്ഷൻ ഏജൻസി അറിയിച്ചു. കഴിഞ്ഞ കുറച്ച് മാസങ്ങളായി, മുന്നൂറിലധികം പിസ്ത ഉൽപ്പന്നങ്ങളോ പിസ്ത അടങ്ങിയ ഉൽപ്പന്നങ്ങളോ തിരിച്ചുവിളിച്ചിട്ടുണ്ട്.
2025 മാർച്ച് പകുതിയോടെ ആരംഭിച്ച സാൽമൊണെല്ല അണുബാധ ജനുവരിയും തുടരുന്നതായി ഫെഡറൽ ഏജൻസി അറിയിച്ചു. ഇറാനിൽ നിന്നുള്ള പിസ്തയും ഇറാനിയൻ പിസ്ത ഉപയോഗിച്ച് നിർമ്മിച്ച ഉൽപ്പന്നങ്ങളും മലിനീകരണ സാധ്യതയുള്ളതിനാൽ ഒഴിവാക്കണമെന്ന് കാനഡയിലെ പബ്ലിക് ഹെൽത്ത് ഏജൻസി നിർദ്ദേശിച്ചിട്ടുണ്ട്. തിരിച്ചുവിളിച്ചു ഉൽപ്പന്നങ്ങൾ കഴിക്കരുതെന്നും അവ ഉപേക്ഷിക്കണമെന്നും ഏജൻസി മുന്നറിയിപ്പ് നൽകി.
പനി, തലവേദന, ഛർദ്ദി, ഓക്കാനം, വയറുവേദന, വയറിളക്കം എന്നിവയാണ് സാൽമൊണെല്ല അണുബാധയുടെ ലക്ഷണങ്ങൾ. ഈ ലക്ഷണങ്ങൾ അനുഭവപ്പെടുന്നവർ ഉടൻ ഡോക്ടറുമായി ബന്ധപ്പെടണം. സാൽമൊണെല്ല കലർന്ന ഭക്ഷണം കഴിക്കുന്ന കൊച്ചുകുട്ടികൾ, ഗർഭിണികൾ, പ്രായമായവർ, രോഗപ്രതിരോധ ശേഷി കുറഞ്ഞവർ എന്നിവർ പ്രത്യേകിച്ച് ഗുരുതരമായ രോഗത്തിന് സാധ്യതയുണ്ട്.
