പി പി ചെറിയാൻ
മിനസോട : മിനസോടയിൽ എൻഫോഴ്സ്മെൻ്റ് (ICE) ഉദ്യോഗസ്ഥന്റെ വെടിയേറ്റ് നിക്കോൾ റെനീ ഗുഡ് എന്ന യുവതി കൊല്ലപ്പെട്ട സംഭവത്തിൽ, അന്വേഷണം എഫ്ബിഐ (FBI) ഏറ്റെടുത്തത് വലിയ രാഷ്ട്രീയ വിവാദത്തിന് വഴിവെച്ചു. മിനസോട പൊലീസിനെ അന്വേഷണത്തിൽ നിന്ന് മാറ്റിനിർത്തിക്കൊണ്ട് എഫ്ബിഐ അധികാരം കൈപ്പിടിയിലൊതുക്കിയതിനെതിരെ മിനസോട ഗവർണർ ടിം വാൾസും മേയർ ജേക്കബ് ഫ്രേയും രംഗത്തെത്തി. ഇത് അധികാര ദുർവിനിയോഗമാണെന്ന് അവർ ആരോപിച്ചു.
ഇമിഗ്രേഷൻ ഏജൻ്റായ ജോനാഥൻ റോസ് ആണ് വെടിവെപ്പ് നടത്തിയത്. തെളിവ് നൽകുന്നത് നിഷേധിച്ചതിനാൽ മിനസോട ബ്യൂറോ ഓഫ് ക്രിമിനൽ അപ്രഹെൻഷൻ (BCA) അന്വേഷണത്തിൽ നിന്ന് പിന്മാറി. ഫെഡറൽ ഏജൻ്റുമാർ നടത്തുന്ന ഇത്തരം വെടിവെപ്പുകളിൽ നീതി ലഭിക്കാൻ ജൂറി വിചാരണ വേണമെന്ന് നിയമവിദഗ്ധർ ആവശ്യപ്പെടുന്നു.
