മൺട്രിയോൾ : പാർട്ടിയെ പിടിച്ചുലച്ച വിവാദങ്ങളെ തുടർന്ന് രാജിവച്ച പാബ്ലോ റോഡ്രിഗസിന് പിൻഗാമിയെ കണ്ടെത്തുന്നതിനായി കെബെക്ക് ലിബറൽ പാർട്ടി (പിഎൽക്യു) നേതൃത്വ മത്സരം നാളെ (ജനുവരി 12 തിങ്കളാഴ്ച) ആരംഭിക്കും. നേതൃത്വത്തിലേക്ക് മത്സരിക്കാൻ ആഗ്രഹിക്കുന്നവർക്ക് ഫെബ്രുവരി 13 വൈകുന്നേരം 5 മണി വരെ സ്ഥാനാർത്ഥിത്വം പ്രഖ്യാപിക്കാൻ സമയമുണ്ട്. മാർച്ച് 14 ന് നടക്കുന്ന പാർട്ടി കൺവെൻഷനിൽ പുതിയ ലിബറൽ നേതാവിനെ തിരഞ്ഞെടുക്കും. പുതിയ നേതൃത്വ മത്സരത്തിന്റെ പശ്ചാത്തലത്തിൽ, പ്രത്യേകിച്ച്, ധനസഹായം സംബന്ധിച്ച ഇലക്ടറൽ ആക്ട് പാലിക്കുന്നുണ്ടെന്ന് ഉറപ്പാക്കാൻ “കംപ്ലയൻസ് ആൻഡ് എത്തിക്സ് ഓഫീസറെ” നിയമിച്ചതായി പിഎൽക്യു കഴിഞ്ഞ ആഴ്ച പ്രഖ്യാപിച്ചിരുന്നു.
മുൻ മത്സരത്തിൽ റോഡ്രിഗസിനോട് പരാജയപ്പെട്ട കെബെക്ക് ഫെഡറേഷൻ ഓഫ് ചേംബേഴ്സ് ഓഫ് കൊമേഴ്സ് മുൻ തലവനായ ചാൾസ് മില്ലിയാർഡ് സ്ഥാനാർത്ഥിത്വം പ്രഖ്യാപിച്ചിട്ടുണ്ട്. കർഷകനായ മാരിയോ റോയിയും രണ്ടാം തവണയും മത്സരരംഗത്തുണ്ട്. വിയ റെയിൽ കാനഡയുടെ മുൻ പ്രസിഡന്റും സിഇഒയുമായ യെവ്സ് ഡെസ്ജാർഡിൻസ്-സിസിലിയാനോ, ഡെസ്ജാർഡിൻസ് ഗ്രൂപ്പ് മുൻ പ്രസിഡന്റും സിഇഒയുമായ ഗൈ കോർമിയർ എന്നിവരുടെ പേരുകൾ സ്ഥാനാർത്ഥി പട്ടികയിലേക്ക് ഉയർന്നു വരുന്നുണ്ട്. അതേസമയം എംപ്ലോയ്മെൻ്റ് കൗൺസിൽ മുൻ ചെയർമാൻ കാൾ ബ്ലാക്ക്ബേൺ, താൻ മത്സരരംഗത്ത് ഉണ്ടാകില്ലെന്ന് ഇതിനകം പ്രഖ്യാപിച്ചിട്ടുണ്ട്.
