ഓട്ടവ: കാനഡയിൽ പാക്കേജ്ഡ് ഭക്ഷണസാധനങ്ങളിൽ ആരോഗ്യത്തിന് ഹാനികരമായേക്കാവുന്ന ചേരുവകളെക്കുറിച്ച് മുന്നറിയിപ്പ് നൽകുന്ന പുതിയ ലേബലിങ് നിയമം പ്രാബല്യത്തിൽ. ജനുവരി 1 മുതൽ നിർമ്മിക്കുന്ന ഉൽപ്പന്നങ്ങളിൽ അമിത കൊഴുപ്പ്, സോഡിയം, പഞ്ചസാര എന്നിവയുടെ അളവ് കൂടുതലാണെങ്കിൽ പാക്കേജിന്റെ മുൻവശത്ത് കറുപ്പും വെളുപ്പും കലർന്ന പ്രത്യേക ലേബലുകൾ നിർബന്ധമായും പതിപ്പിക്കണം. ഹൃദ്രോഗം, പ്രമേഹം, ഉയർന്ന രക്തസമ്മർദ്ദം, ചില തരം കാൻസറുകൾ എന്നിവ തടയുന്നതിന്റെ ഭാഗമായാണ് ഹെൽത്ത് കാനഡയുടെ ഈ കർശന നടപടി.
ഒരു വ്യക്തി ഒരു ദിവസം കഴിക്കേണ്ട പോഷകങ്ങളുടെ അളവിന്റെ (Daily Value) 15 ശതമാനത്തിൽ കൂടുതൽ ലവണങ്ങളോ കൊഴുപ്പോ പഞ്ചസാരയോ ഒരു ഉൽപ്പന്നത്തിൽ അടങ്ങിയിട്ടുണ്ടെങ്കിൽ അത് ഉയർന്ന അളവ് ആയി കണക്കാക്കും. ഇങ്ങനെയുള്ള പാക്കറ്റുകളുടെ മുൻവശത്ത് ഉപഭോക്താക്കൾക്ക് പെട്ടെന്ന് തിരിച്ചറിയാൻ സാധിക്കുന്ന വിധത്തിൽ ലേബലുകൾ വേണമെന്ന് നിയമം വ്യവസ്ഥ ചെയ്യുന്നു. നിലവിൽ പാക്കേജിന്റെ പുറകുവശത്ത് പോഷകവിവരങ്ങൾ രേഖപ്പെടുത്താറുണ്ടെങ്കിലും പലപ്പോഴും ഉപഭോക്താക്കൾ ഇത് ശ്രദ്ധിക്കാറില്ലെന്ന് ടൊറന്റോ മെട്രോപൊളിറ്റൻ സർവകലാശാലയിലെ ന്യൂട്രീഷൻ പ്രൊഫസർ ജെനിഫർ ലീ അഭിപ്രായപ്പെട്ടു. മുൻവശത്തെ പുതിയ ചിഹ്നം ഉപഭോക്താക്കൾക്ക് കൂടുതൽ അവബോധം നൽകാൻ സഹായിക്കുമെന്ന് അവർ ചൂണ്ടിക്കാട്ടി.
അമിതവണ്ണവും അനുബന്ധ ആരോഗ്യപ്രശ്നങ്ങളും കാനഡയിൽ വർദ്ധിച്ചുവരുന്ന സാഹചര്യത്തിലാണ് ഈ മാറ്റം. ലോകമെമ്പാടും പരീക്ഷിച്ചു വിജയിച്ച ഈ ലേബലിങ് രീതി ആരോഗ്യകരമായ ഭക്ഷണശീലം വളർത്താൻ സഹായിക്കുമെന്ന് പഠനങ്ങൾ വ്യക്തമാക്കുന്നു. പ്രത്യേകിച്ച് കുട്ടികൾക്കിടയിൽ അമിതവണ്ണം വർദ്ധിക്കുന്നത് മാനസികവും ശാരീരികവുമായ പ്രയാസങ്ങൾക്ക് കാരണമാകുമെന്ന് ഹെൽത്ത് കാനഡ മുന്നറിയിപ്പ് നൽകി. നിലവിലെ കണക്കനുസരിച്ച് മാറ്റങ്ങൾ വരുത്തിയില്ലെങ്കിൽ 2050-ഓടെ ലോകജനസംഖ്യയുടെ 60% അമിതവണ്ണത്തിന്റെ പിടിയിലാകുമെന്നും വിദഗ്ധർ സൂചിപ്പിക്കുന്നു.
