സെൻ്റ് ജോൺസ്: ന്യൂഫിൻലൻഡ് ആൻഡ് ലാബ്രഡോറിലെ Bay du Nord ഓഫ്ഷോർ എണ്ണപ്പാടം പദ്ധതി സംബന്ധിച്ച അന്തിമ തീരുമാനം നോർവീജിയൻ ഊർജ്ജ കമ്പനിയായ ഇക്വിനോർ (Equinor) വീണ്ടും നീട്ടിവെച്ചു. പ്രവിശ്യാ സർക്കാരുമായുള്ള ആനുകൂല്യ കരാറിൽ അന്തിമ ധാരണയിലെത്തുന്നതിനായുള്ള സമയപരിധിയാണ് മാറ്റിയത്. ഒക്ടോബറിൽ നടന്ന തിരഞ്ഞെടുപ്പിൽ വിജയിച്ച പുതിയ പ്രോഗ്രസീവ് കൺസർവേറ്റീവ് സർക്കാരുമായുള്ള ചർച്ചകൾ പൂർത്തിയാക്കാൻ സമയം ആവശ്യമാണെന്ന് കമ്പനി വ്യക്തമാക്കി.
നേരത്തെ ഡിസംബറിലായിരുന്നു ഈ വിഷയത്തിൽ തീരുമാനമെടുക്കാൻ നിശ്ചയിച്ചിരുന്നത്. 140 കോടി ഡോളർ ചിലവ് പ്രതീക്ഷിക്കുന്ന ഈ വൻകിട പദ്ധതിയുമായി മുന്നോട്ട് പോകണമോ എന്ന കാര്യത്തിൽ 2027-ഓടെ മാത്രമേ അന്തിമ തീരുമാനമുണ്ടാകൂ എന്ന് കമ്പനി വക്താവ് എറിക്ക കെല്ലൻഡ് അറിയിച്ചു. പദ്ധതിയുടെ ഭാഗമായുള്ള നിർമ്മാണ പ്രവർത്തനങ്ങൾ പ്രവിശ്യയിൽ തന്നെ നടത്തണമെന്നാണ് സർക്കാരിന്റെ ആവശ്യം. എന്നാൽ ഇത് മറ്റ് സ്ഥലങ്ങളിൽ ചെയ്യുന്നതാണ് കൂടുതൽ ലാഭകരമെന്ന സാമ്പത്തിക വിലയിരുത്തലുകൾ പദ്ധതിക്ക് വെല്ലുവിളിയാകുന്നുണ്ട്.
2022-ൽ ഫെഡറൽ സർക്കാർ പദ്ധതിക്ക് അനുമതി നൽകിയിരുന്നെങ്കിലും, നിർമ്മാണ ചിലവ് കുറയ്ക്കാനുള്ള വഴികൾ തേടുന്നതിന്റെ ഭാഗമായി 2023-ൽ ഇക്വിനോർ ഇത് താൽക്കാലികമായി നിർത്തിവെച്ചിരുന്നു. നിലവിലെ കാലതാമസത്തിൽ ആശങ്കപ്പെടാനില്ലെന്ന് എണ്ണ വ്യവസായ രംഗത്തെ വിദഗ്ധർ അഭിപ്രായപ്പെടുന്നുണ്ടെങ്കിലും, സാമ്പത്തിക ലാഭക്ഷമത ഉറപ്പാക്കിയാൽ മാത്രമേ പദ്ധതി യാഥാർത്ഥ്യമാകൂ. പുതിയ സർക്കാർ അധികാരമേറ്റ സാഹചര്യത്തിൽ വരും മാസങ്ങളിൽ ഇത് സംബന്ധിച്ച് കൂടുതൽ വ്യക്തതയുണ്ടാകുമെന്നാണ് റിപ്പോർട്ടുകൾ.
