പി പി ചെറിയാൻ
ഡാലസ് : അതിശൈത്യത്തെത്തുടർന്ന് നോർത്ത് ടെക്സസിലെ സ്കൂളുകൾക്ക് ബുധനാഴ്ചയും അവധി പ്രഖ്യാപിച്ചു. ചൊവ്വാഴ്ച ഉച്ചയോടെ മഞ്ഞ് ഉരുകാൻ തുടങ്ങുമെങ്കിലും, രാത്രിയിൽ താപനില വീണ്ടും താഴുന്നതോടെ റോഡുകളിൽ വെള്ളം ഉറഞ്ഞുകൂടി ‘ബ്ലാക്ക് ഐസ്’ രൂപപ്പെടാൻ സാധ്യതയുണ്ടെന്ന് കാലാവസ്ഥാ ഏജൻസി മുന്നറിയിപ്പ് നൽകി. പ്രധാന റോഡുകളിലെ മഞ്ഞ് നീക്കം ചെയ്തിട്ടുണ്ടെങ്കിലും, പാർക്കിങ് സ്ഥലങ്ങളിലും ഇടറോഡുകളിലും ഐസ് നിറഞ്ഞുകിടക്കുന്നത് യാത്ര അപകടകരമാക്കുന്നു.
ഇന്ന് ഉച്ചയ്ക്ക് ശേഷം താപനില ഉയരുമെങ്കിലും രാത്രിയോടെ വീണ്ടും തണുപ്പ് കടുക്കും. ഇത് ഉരുകിയ മഞ്ഞ് വീണ്ടും ഉറയ്ക്കാൻ (Refreeze) കാരണമാകും. ഈ വാരാന്ത്യത്തിൽ വീണ്ടുമൊരു ആർട്ടിക് ശൈത്യതരംഗം എത്താൻ സാധ്യതയുണ്ട്. ഇതോടെ താപനില ക്രമാതീതമായി കുറയും. അതിശൈത്യ കാലാവസ്ഥയിൽ പൈപ്പുകൾ പൊട്ടാതിരിക്കാൻ ഇൻസുലേറ്റ് ചെയ്യണമെന്നും വളർത്തുമൃഗങ്ങളെ വീടിനുള്ളിൽ സുരക്ഷിതമായി നിർത്തണമെന്നും അധികൃതർ അറിയിച്ചു. മരവിപ്പിക്കുന്ന തണുപ്പും മൂടൽമഞ്ഞും ബുധനാഴ്ച രാവിലെ വരെ തുടരാൻ സാധ്യതയുള്ളതിനാൽ ഡ്രൈവർമാർ അതീവ ജാഗ്രത പാലിക്കണം.
