മിസ്സിസാഗ: നഗരത്തിൽ നാൽപ്പത്തിയെട്ടോളം വാഹനങ്ങൾ തകർത്ത് വൻ കവർച്ച നടത്തിയ സംഭവത്തിൽ 20 വയസ്സുകാരനെ പൊലീസ് അറസ്റ്റ് ചെയ്തു. ബാസിൽ അസ്സാദ് എന്ന യുവാവാണ് പിടിയിലായത്. ഇയാൾക്കൊപ്പം മറ്റ് ചിലർക്കും സംഭവത്തിൽ പങ്കുണ്ടെന്ന് പീൽ പൊലീസ് അധികൃതർ പറഞ്ഞു. 2025 ഡിസംബർ മാസത്തിൽ മിസ്സിസാഗയിലെ കിംബർമൗണ്ട് അവന്യൂ, അക്വിറ്റെയ്ൻ അവന്യൂ, റീജന്റ്സ് ടെറസ് എന്നീ പ്രദേശങ്ങളിൽ നിന്നായി വാഹനങ്ങൾ തകർക്കപ്പെടുന്നതായി പോലീസിന് നിരവധി പരാതികൾ ലഭിച്ചിരുന്നു. വാഹനങ്ങളുടെ ചില്ല് തകർത്ത് അകത്ത് കടന്ന പ്രതികൾ, കാറുകളിൽ സൂക്ഷിച്ചിരുന്ന പണം, ആഭരണങ്ങൾ, ക്രെഡിറ്റ് കാർഡുകൾ എന്നിവയാണ് മോഷ്ടിച്ചത്. തുടർന്ന് നടത്തിയ സിസിടിവി പരിശോധനയിലൂടെയാണ് ബാസിലിനെ തിരിച്ചറിഞ്ഞത്.
ജനുവരി 26-ന് അറസ്റ്റ് ചെയ്ത ബാസിലിനെതിരെ അഞ്ച് പ്രധാന കുറ്റകൃത്യങ്ങളിലായി നിരവധി വകുപ്പുകൾ ചുമത്തി. 57 കേസുകളാണ് നിലവിൽ ഇയാൾക്കെതിരെയുള്ളത്. പ്രതിയെ നിലവിൽ ജാമ്യാപേക്ഷയ്ക്കായി തടങ്കലിൽ വെച്ചിരിക്കുകയാണ്. ഈ മോഷണ പരമ്പരയിൽ പങ്കാളികളായ മറ്റ് പ്രതികളെക്കുറിച്ച് വിവരം ലഭിക്കുന്നവർ പൊലീസുമായി ബന്ധപ്പെടണമെന്ന് അധികൃതർ അറിയിച്ചു.
