വാഷിങ്ടൺ: നിർണ്ണായക ധാതുക്കളുടെ വിതരണ ശൃംഖലയിൽ ചൈനയുടെ ആധിപത്യം തടയുന്നതിനായി വാഷിങ്ടണിൽ നടക്കുന്ന അന്താരാഷ്ട്ര ഉച്ചകോടിയിൽ കനേഡിയൻ വിദേശകാര്യ മന്ത്രി അനിത ആനന്ദ് പങ്കെടുക്കും. അമേരിക്കൻ വിദേശകാര്യ സെക്രട്ടറി മാർക്കോ റൂബിയോയുടെ അധ്യക്ഷതയിൽ ചേരുന്ന യോഗത്തിൽ യൂറോപ്പ്, ആഫ്രിക്ക, ഏഷ്യ എന്നിവിടങ്ങളിൽ നിന്നുള്ള പ്രതിനിധികൾ പങ്കെടുക്കുന്നുണ്ട്. അപൂർവ്വ ധാതുക്കളുടെ ലഭ്യത ഉറപ്പാക്കാനും ഈ മേഖലയിലെ നിക്ഷേപം പ്രോത്സാഹിപ്പിക്കാനും ലക്ഷ്യമിട്ടുള്ള സഹകരണമാണ് ചർച്ചകളുടെ പ്രധാന അജണ്ട.
നിർണ്ണായക ധാതുക്കൾക്കായി ‘പ്രോജക്ട് വോൾട്ട്’ എന്ന പേരിൽ തന്ത്രപ്രധാനമായ കരുതൽ ശേഖരം രൂപീകരിക്കുമെന്ന് പ്രസിഡന്റ് ഡോണൾഡ് ട്രംപ് പ്രഖ്യാപിച്ചതിന് പിന്നാലെയാണ് ഈ കൂടിക്കാഴ്ച നടക്കുന്നത്. വാഹനങ്ങൾ, ഇലക്ട്രോണിക്സ് ഉപകരണങ്ങൾ എന്നിവയുടെ നിർമ്മാണത്തിന് ആവശ്യമായ ധാതുക്കളുടെ വിതരണം തടസ്സമില്ലാതെ ഉറപ്പാക്കാൻ ഈ പദ്ധതിയോടെ സാധിക്കും. ഇതിനായി യുഎസ് എക്സ്പോർട്ട്-ഇമ്പോർട്ട് ബാങ്ക് 1000 കോടി ഡോളർ വായ്പയും സ്വകാര്യ മേഖലയിൽ നിന്ന് ഏകദേശം 1670 കോടി ഡോളറും അനുവദിച്ചിട്ടുണ്ട്.
ചൈനയുമായുള്ള വ്യാപാര യുദ്ധം ശക്തമായ സാഹചര്യത്തിൽ, നിർണ്ണായക ധാതുക്കളുടെ കയറ്റുമതിയിൽ ബെയ്ജിങ് ഏർപ്പെടുത്തിയ നിയന്ത്രണങ്ങൾ അന്താരാഷ്ട്ര വിപണിയിൽ ആശങ്കയുണ്ടാക്കിയിരുന്നു. ഓസ്ട്രേലിയ, ജപ്പാൻ തുടങ്ങിയ രാജ്യങ്ങളുമായി അമേരിക്ക ഇതിനകം കരാറുകളിൽ ഏർപ്പെട്ടിട്ടുണ്ട്. കാനഡയും യുഎസും തമ്മിൽ നിലവിൽ ഖനന വികസനത്തിന് സംയുക്ത നിക്ഷേപ കരാറുകൾ ഉണ്ടെങ്കിലും, പുതിയ സാഹചര്യത്തിൽ വ്യാപാര മേഖലയിൽ കൂടുതൽ ഉറപ്പുകൾ നൽകാൻ ഈ കൂടിക്കാഴ്ച സഹായിക്കുമെന്നാണ് കാനഡയുടെ പ്രതീക്ഷ.
