ടൊറൻ്റോ : നിരവധി ക്രിമിനൽ കുറ്റകൃത്യങ്ങളിൽ ഉൾപ്പെട്ടതായി കണ്ടെത്തിയ മൂന്ന് പീൽ പൊലീസ് ഉദ്യോഗസ്ഥരെ സസ്പെൻഡ് ചെയ്തു. പ്രോജക്ട് സൗത്ത് എന്ന പേരിൽ യോർക്ക് റീജനൽ പൊലീസ് (YRP) ആരംഭിച്ച അന്വേഷണത്തിലാണ് സസ്പെൻഷൻ. 2025 ജൂണിൽ യോർക്ക് മേഖലയിലെ ഒരു വീട്ടിൽ ജയിൽ ഉദ്യോഗസ്ഥനെ കൊലപ്പെടുത്താനുള്ള ഗൂഢാലോചന അന്വേഷകർ കണ്ടെത്തി തടസ്സപ്പെടുത്തിയതിനെത്തുടർന്നാണ് അന്വേഷണം ആരംഭിച്ചത്.
ജയിൽ ഉദ്യോഗസ്ഥനെ കൊലപ്പെടുത്താനുള്ള ഗൂഢാലോചന നടത്തിയ കേസിൽ ഏഴ് ടൊറൻ്റോ പൊലീസ് ഉദ്യോഗസ്ഥരെയും ഒരു വിരമിച്ച ടൊറൻ്റോ പൊലീസ് ഉദ്യോഗസ്ഥനെയും മറ്റ് 19 പേരെയും ഇതിനകം അറസ്റ്റ് ചെയ്തിട്ടുണ്ട്. പൊലീസ് ഉദ്യോഗസ്ഥരുടെ പേരിലുള്ള അഴിമതിയും സംഘടിത കുറ്റകൃത്യങ്ങളും സംബന്ധിച്ച അന്വേഷണത്തിൽ ഉദ്യോഗസ്ഥർ നിയമവിരുദ്ധമായി വിവരങ്ങൾ ആക്സസ് ചെയ്തതായി കണ്ടെത്തി. ഈ വിവരങ്ങൾ പിന്നീട് വെടിവെപ്പും മറ്റ് കുറ്റകൃത്യങ്ങളും നടത്തിയ കുറ്റവാളികൾക്ക് കൈമാറിയിട്ടുണ്ടെന്നും പ്രോജക്ട് സൗത്ത് അന്വേഷണത്തിൽ കണ്ടെത്തി.
