ഓട്ടവ : കാനഡയിലെ പൊതുമേഖലാ ജീവനക്കാർ ആഴ്ചയിൽ നാല് ദിവസം നിർബന്ധമായും ഓഫീസിലെത്തണമെന്ന ട്രഷറി ബോർഡിൻ്റെ പുതിയ ഉത്തരവ് കടുത്ത പ്രതിസന്ധി സൃഷ്ടിക്കുന്നതായി റിപ്പോർട്ട്. ജൂലൈ 6 മുതൽ പ്രാബല്യത്തിൽ വരുന്ന ഈ നിർദ്ദേശം നടപ്പിലാക്കാൻ ആവശ്യമായ സ്ഥലസൗകര്യങ്ങളോ ഗതാഗത സംവിധാനങ്ങളോ നിലവിലില്ലെന്ന് വിദഗ്ധരും തൊഴിലാളി യൂണിയനുകളും ഒരേപോലെ മുന്നറിയിപ്പ് നൽകുന്നു. നിലവിൽ മൂന്ന് ദിവസം ഓഫീസിലെത്തുന്ന ജീവനക്കാർ തന്നെ ഇരിക്കാൻ ഇടമില്ലാതെ വലയുകയാണെന്നും, പല കെട്ടിടങ്ങളിലും ശുചിത്വമില്ലായ്മയും എലികളുടെ ശല്യവും രൂക്ഷമാണെന്നും അസോസിയേഷൻ ഓഫ് ജസ്റ്റിസ് കൗൺസിൽ ചൂണ്ടിക്കാട്ടി. കൃത്യമായ പദ്ധതിയോ മുന്നൊരുക്കമോ ഇല്ലാതെ സർക്കാർ നടത്തുന്ന ഈ നീക്കം ഉദ്യോഗസ്ഥരുടെ മനോവീര്യത്തെ തകർക്കുമെന്നാണ് യൂണിയനുകളുടെ പക്ഷം.
ഓട്ടവയിലെ പൊതുഗതാഗത സംവിധാനമായ ഒസി ട്രാൻസ്പോയും എസ്ടിഒയും ഇത്രയധികം യാത്രക്കാരെ ഉൾക്കൊള്ളാൻ പ്രയാസപ്പെടുമെന്ന റിപ്പോർട്ടുകൾ പുറത്തുവരുന്നുണ്ട്. ഗതാഗത കുരുക്കും പാർക്കിങ് സൗകര്യങ്ങളുടെ കുറവും ജീവനക്കാരെ വലയ്ക്കുമ്പോൾ തന്നെ, സാമ്പത്തിക പ്രതിസന്ധിക്കിടയിൽ ഇത്ര വലിയ തുക ചിലവാക്കി ഓഫീസ് സംവിധാനങ്ങൾ വിപുലീകരിക്കുന്നത് യുക്തിക്ക് നിരക്കാത്തതാണെന്ന് പിഎസ്എസി ഉൾപ്പെടെയുള്ള സംഘടനകൾ ആരോപിക്കുന്നു. എന്നാൽ പൊതുസേവന മേഖലയെ കൂടുതൽ ശക്തമാക്കാനാണ് പുതിയ മാറ്റമെന്ന് സർക്കാർ വൃത്തങ്ങൾ അറിയിച്ചു. സ്ഥലപരിമിതിയുള്ളയിടങ്ങളിൽ ഉടൻ പരിഹാരം കണ്ടെത്തുമെന്ന് അധികൃതർ അറിയിച്ചെങ്കിലും, ചുരുങ്ങിയ സമയത്തിനുള്ളിൽ പ്രായോഗികമായ മാറ്റങ്ങൾ ഉണ്ടാകുമോ എന്ന കാര്യത്തിൽ ജീവനക്കാർക്കിടയിൽ കടുത്ത ആശങ്ക നിലനിൽക്കുന്നു.
