കൊച്ചി: കേരളം ആസ്ഥാനമായ പ്രമുഖ സ്വകാര്യ ബാങ്കായ ഫെഡറല് ബാങ്കിന്റെ (Federal Bank) കൂടുതല് ഓഹരികള് വാങ്ങാന് ഐസിഐസിഐ പ്രുഡന്ഷ്യല് അസറ്റ് മാനേജ്മെന്റ് കമ്പനിക്കും ഐസിഐസിഐ ബാങ്ക് ഗ്രൂപ്പിനും റിസര്വ് ബാങ്ക് അനുമതി നല്കി. ബാങ്കിന്റെ പെയ്ഡ് അപ്പ് ഷെയര് ക്യാപിറ്റലിന്റെയോ വോട്ടിംഗ് അവകാശത്തിന്റെയോ 9.95 ശതമാനം വരെ കൈവശം വെക്കാനാണ് പുതിയ അനുമതി ലഭിച്ചിരിക്കുന്നത്. നിലവില് ഫെഡറല് ബാങ്കില് ഓഹരി പങ്കാളിത്തമുള്ള ഐസിഐസിഐ ഗ്രൂപ്പിന് ഇത് ഗണ്യമായി വര്ദ്ധിപ്പിക്കാന് പുതിയ നീക്കം സഹായിക്കും. ഫെബ്രുവരി 11-നാണ് ഇത് സംബന്ധിച്ച ഔദ്യോഗിക അറിയിപ്പ് ബാങ്കിന് ലഭിച്ചത്.
ആര്ബിഐയുടെ നിബന്ധനകള് പ്രകാരം, അനുമതി ലഭിച്ച തീയതി മുതല് ഒരു വര്ഷത്തിനുള്ളില് (2027 ഫെബ്രുവരി 10-നകം) നിക്ഷേപ നടപടികള് പൂര്ത്തിയാക്കേണ്ടതുണ്ട്. ഓഹരി വിഹിതം നിശ്ചയിച്ചിട്ടുള്ള 9.95 ശതമാനത്തില് കൂടാന് പാടില്ലെന്നും ആര്ബിഐ നിര്ദ്ദേശിച്ചിട്ടുണ്ട്. ഏതെങ്കിലും സാഹചര്യത്തില് ഓഹരി പങ്കാളിത്തം 5 ശതമാനത്തില് താഴെയായാല്, പിന്നീട് അത് ഉയര്ത്താന് വീണ്ടും ആര്ബിഐയുടെ മുന്കൂര് അനുമതി ആവശ്യമാണ്. ബാങ്കിംഗ് റെഗുലേഷന് ആക്ട്, സെബി മാനദണ്ഡങ്ങള് എന്നിവ പാലിച്ചുകൊണ്ടായിരിക്കണം ഈ ഓഹരി കൈമാറ്റം നടക്കേണ്ടത്.
ഫെഡറല് ബാങ്കിന് പുറമെ ഇന്ഡസ്ഇന്ഡ് ബാങ്ക് ഉള്പ്പെടെയുള്ള മറ്റ് ബാങ്കുകളിലും നിക്ഷേപം വര്ദ്ധിപ്പിക്കാന് ഐസിഐസിഐ ഗ്രൂപ്പിന് അനുമതി ലഭിച്ചിട്ടുണ്ട്. അടുത്തിടെ സമാനമായ രീതിയില് ആറ് ബാങ്കുകളില് ഓഹരി പങ്കാളിത്തം വര്ദ്ധിപ്പിക്കാന് എച്ച്ഡിഎഫ്സി ബാങ്കിനും ആര്ബിഐ അനുമതി നല്കിയിരുന്നു. ഫെഡറല് ബാങ്കിന്റെ ദീര്ഘകാല വളര്ച്ചാ സാധ്യതകള് കണക്കിലെടുത്താണ് ഐസിഐസിഐ ഗ്രൂപ്പിന്റെ ഈ വലിയ നീക്കമെന്നാണ് സാമ്പത്തിക വിദഗ്ധരുടെ വിലയിരുത്തല്. അനുമതി ലഭിച്ച വാര്ത്ത പുറത്തുവന്നതിന് പിന്നാലെ ഓഹരി വിപണിയില് ഫെഡറല് ബാങ്ക് ഓഹരികള് നിക്ഷേപകര് സജീവമായി നിരീക്ഷിക്കുന്നുണ്ട്.
