ഓട്ടവ : കാനഡയിലേക്ക് കുടിയേറാൻ ഒരുങ്ങുന്നവർക്ക് തിരിച്ചടിയായി അപേക്ഷാ ബാക്ക്ലോഗ് കുതിച്ചുയരുന്നു. 2025 അവസാനത്തോടെ, മൊത്തം അപേക്ഷാ ബാക്ക്ലോഗ് 1,014,700 എത്തിയതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) റിപ്പോർട്ട് ചെയ്തു. മൊത്തത്തിൽ, 2025 ഡിസംബർ അവസാനത്തോടെ IRCC ഇമിഗ്രേഷൻ സിസ്റ്റത്തിൽ ആകെ 2,127,500 അപേക്ഷകൾ ഉണ്ടായിരുന്നു. അതേസമയം ഈ ആകെ അപേക്ഷകളിൽ 1,112,800 അപേക്ഷകൾ സേവന മാനദണ്ഡങ്ങൾക്കുള്ളിൽ പ്രോസസ്സ് ചെയ്തു. ഐആർസിസിയുടെ സമീപകാല റിപ്പോർട്ടിൽ കാണുന്ന ഏറ്റവും ശ്രദ്ധേയമായ മാറ്റം എക്സ്പ്രസ് എൻട്രി ബാക്ക്ലോഗ് കുറയുന്നതാണ്. മുൻ മാസത്തെ 32% മായി താരതമ്യം ചെയ്യുമ്പോൾ എക്സ്പ്രസ് എൻട്രി അപേക്ഷകളുടെ ബാക്ക്ലോഗ് 20% ആയി കുറഞ്ഞു. പൗരത്വ, ഇമിഗ്രേഷൻ, താൽക്കാലിക വീസ എന്നിവ പ്രോസ്സസ് ചെയ്യാൻ ഇമിഗ്രേഷൻ ഡിപ്പാർട്ട്മെൻ്റ് നിശ്ചയിച്ചിട്ടുള്ള ശരാശരി സേവന നിലവാരത്തേക്കാൾ കൂടുതൽ സമയം എടുക്കുന്നതിനെയാണ് ഇമിഗ്രേഷൻ ബാക്ക്ലോഗ് എന്നതുകൊണ്ട് അർത്ഥമാക്കുന്നത്.
സ്ഥിര താമസ അപേക്ഷകൾ
2025 ഡിസംബർ 31 വരെ IRCC യുടെ ഇൻവെന്ററിയിൽ ആകെ 973,800 PR അപേക്ഷകൾ ഉണ്ടായിരുന്നു. നവംബറുമായി താരതമ്യം ചെയ്യുമ്പോൾ ഇത് 32,200 അപേക്ഷകളുടെ വർധനയാണ് രേഖപ്പെടുത്തിയത്. ഈ ആകെ അപേക്ഷകളിൽ 446,300 (46%) അപേക്ഷകൾ സേവന മാനദണ്ഡങ്ങൾക്കുള്ളിൽ പ്രോസസ്സ് ചെയ്തു. അതായത് 527,500 അപേക്ഷകൾ ബാക്ക്ലോഗിലാണ്.
താൽക്കാലിക താമസ അപേക്ഷകൾ
IRCC പുറത്തുവിട്ട ഏറ്റവും പുതിയ കണക്കുകൾ കാണിക്കുന്നത് ഡിസംബർ 31 വരെ, വകുപ്പിന്റെ ഇൻവെന്ററിയിൽ 910,900 താൽക്കാലിക താമസ അപേക്ഷകൾ ഉണ്ടായിരുന്നു എന്നാണ് (മുൻ മാസത്തേക്കാൾ 31,100 അപേക്ഷകളുടെ കുറവ്). ആകെ താൽക്കാലിക താമസ അപേക്ഷകളിൽ 483,000 (53%) സേവന മാനദണ്ഡങ്ങൾക്കുള്ളിൽ പ്രോസസ്സ് ചെയ്തു. 427,900 അപേക്ഷകൾ കെട്ടിക്കിടക്കുന്നതായി കണക്കാക്കപ്പെട്ടു.
പൗരത്വ ഗ്രാൻ്റുകൾ
ഡിസംബർ 31 വരെ, IRCC യുടെ ഇൻവെന്ററിയിൽ 242,800 പൗരത്വ ഗ്രാൻ്റ് അപേക്ഷകൾ ഉണ്ടായിരുന്നു – നവംബർ 30 നെ അപേക്ഷിച്ച് 4,300 കുറവ്. ഇതിൽ 183,500 (76%) എണ്ണം സേവന മാനദണ്ഡങ്ങൾക്കുള്ളിൽ പ്രോസസ്സ് ചെയ്തു. ബാക്കി 59,300 പൗരത്വ ഗ്രാൻ്റ് അപേക്ഷകൾ ബാക്ക്ലോഗായി കണക്കാക്കുന്നു.
