വാഷിങ്ടൺ: പ്രസിഡന്റ് ഡോണൾഡ് ട്രംപിനെ “ദക്ഷിണേഷ്യയുടെ രക്ഷകൻ” എന്ന് വിശേഷിപ്പിച്ച് പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്. വാഷിങ്ടണിൽ നടന്ന സമാധാന ബോർഡ് ഉച്ചകോടിയിൽ സംസാരിക്കവെയാണ് ട്രംപിന്റെ നയതന്ത്ര ഇടപെടലുകളെ ഷെരീഫ് വാനോളം പുകഴ്ത്തിയത്. ഇന്ത്യയും പാക്കിസ്ഥാനും തമ്മിലുള്ള വെടിനിർത്തൽ ഉറപ്പാക്കുന്നതിൽ ട്രംപ് വഹിച്ച പങ്കിന് നന്ദി പറഞ്ഞ അദ്ദേഹം, ട്രംപിന്റെ ഇടപെടൽ ദശലക്ഷക്കണക്കിന് ആളുകളുടെ ജീവൻ രക്ഷിച്ചതായും പ്രസ്താവിച്ചു.
ഇന്ത്യ-പാക്ക് ബന്ധത്തിന് പുറമെ പലസ്തീൻ വിഷയത്തിലും ഷെഹ്ബാസ് ഷെരീഫ് ശക്തമായ നിലപാട് വ്യക്തമാക്കി. പലസ്തീൻ ജനതയുടെ സ്വയം നിർണ്ണയാവകാശത്തെയും സ്വതന്ത്ര പലസ്തീൻ രാഷ്ട്രം എന്ന ആശയത്തെയും അദ്ദേഹം പ്രസംഗത്തിൽ ഊന്നിപ്പറഞ്ഞു. ഗാസയിൽ ശാശ്വതമായ സമാധാനം പുലരണമെന്നും വെടിനിർത്തൽ ലംഘനങ്ങളും പുനർനിർമ്മാണ ശ്രമങ്ങൾക്കുള്ള തടസ്സങ്ങളും എത്രയും വേഗം അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
ഉജ്ജ്വലമായ പ്രസംഗത്തിലുടനീളം ട്രംപിന്റെ സമാധാന ശ്രമങ്ങളെ പിന്തുണച്ച ഷെരീഫ്, ലോകത്തെ വലിയൊരു യുദ്ധത്തിൽ നിന്ന് ഒഴിവാക്കിയത് ട്രംപിന്റെ ധീരമായ നയതന്ത്ര നീക്കങ്ങളാണെന്ന് അവകാശപ്പെട്ടു. ദക്ഷിണേഷ്യയിലെ സമാധാന അന്തരീക്ഷം നിലനിർത്തുന്നതിൽ വാഷിങ്ടണിന്റെ പങ്കിനെക്കുറിച്ചും ട്രംപും ഷെരീഫും തമ്മിലുള്ള വ്യക്തിപരമായ സൗഹൃദത്തെക്കുറിച്ചും ഊന്നിപ്പറയുന്നതായിരുന്നു അദ്ദേഹത്തിന്റെ വാക്കുകൾ.
