ഓട്ടവ: ഫെഡറൽ സർക്കാർ ഫണ്ട് വെട്ടിക്കുറച്ചതിനെത്തുടർന്ന് ഗ്രേറ്റർ ടൊറന്റോ ഏരിയയിലെ പകുതിയോളം കുടിയേറ്റ സേവന കേന്ദ്രങ്ങൾ അടച്ചു പൂട്ടൽ ഭീഷണിയിലാണെന്ന് പുതിയ റിപ്പോർട്ട്. 2024 മുതൽ നിലവിൽ വന്ന ബജറ്റ് നിയന്ത്രണങ്ങൾ കാരണം 44% ഏജൻസികളും തങ്ങളുടെ പ്രധാന പ്രോഗ്രാമുകൾ നിർത്തലാക്കേണ്ടി വരുമെന്ന ആശങ്കയിലാണ്. യുണൈറ്റഡ് വേ ഗ്രേറ്റർ ടൊറന്റോ ഉൾപ്പെടെയുള്ള സംഘടനകൾ നടത്തിയ സർവ്വേയിലാണ് ഈ വിവരങ്ങളുള്ളത്.
ഭാഷാ പരിശീലനം, തൊഴിൽ സഹായം എന്നിവ നൽകുന്ന പദ്ധതികളെയാണ് ഈ സാമ്പത്തിക പ്രതിസന്ധി സാരമായി ബാധിക്കുന്നത്. പുതിയതായി എത്തുന്നവർക്ക് മതിയായ ഭാഷാപരിചയം ലഭിക്കാത്തത് അവർക്ക് ജോലി ലഭിക്കുന്നതിനെ തടസ്സപ്പെടുത്തുകയും, ഇത് പിന്നീട് അവരുടെ പാർപ്പിട സൗകര്യങ്ങളെയും ജീവിതനിലവാരത്തെയും ബാധിക്കുകയും ചെയ്യും. സേവന കേന്ദ്രങ്ങൾ ഉപയോഗിക്കുന്നവരിൽ വലിയൊരു വിഭാഗം കുട്ടികളുള്ള കുടുംബങ്ങളായതിനാൽ ഇത് വലിയൊരു സാമൂഹിക പ്രതിസന്ധിക്കാണ് വഴിതുറക്കുന്നത്.
കുടിയേറ്റക്കാരുടെ എണ്ണം കുറയ്ക്കാനുള്ള സർക്കാരിന്റെ നീക്കമാണ് ഫണ്ട് കുറയാൻ കാരണമായത്. എന്നാൽ ആവശ്യക്കാരുടെ എണ്ണത്തിൽ 70% വർധനവുണ്ടായിട്ടും സേവന കേന്ദ്രങ്ങളുടെ ശേഷിയിൽ വലിയ കുറവാണുള്ളത്. 2028-ഓടെ ഈ മേഖലയിൽ 300-ലധികം ജീവനക്കാർക്ക് തൊഴിൽ നഷ്ടപ്പെടുമെന്നും റിപ്പോർട്ട് സൂചിപ്പിക്കുന്നു. ഇത് കുടിയേറ്റക്കാർക്ക് സേവനങ്ങൾ ലഭിക്കുന്നതിനായുള്ള കാത്തിരിപ്പ് സമയം വർദ്ധിപ്പിക്കുകയും നിലവിലുള്ള ജീവനക്കാരുടെ ജോലിഭാരം കൂട്ടുകയും ചെയ്യും.
