എഡ്മിന്റൻ: ഹൈവേ 16-ലുണ്ടായ ദാരുണമായ വാഹനാപകടത്തിൽ രണ്ട് യുവ വനിതാ ഹോക്കി താരങ്ങൾ കൊല്ലപ്പെട്ടു. കെയ്ല പീക്കോക്ക് (17), ഡാനിക്ക ഹിൽസ് ( 18) എന്നിവരാണ് മരിച്ചത്. തിങ്കളാഴ്ച രാത്രി ഹൈവേ 16-ൽ ഇവർ സഞ്ചരിച്ചിരുന്ന പിക്കപ്പ് ട്രക്ക് സെമി ട്രെയിലറുമായി കൂട്ടിയിടിച്ചായിരുന്നു അപകടം. ജാസ്പറിലെ ടീം ഫോട്ടോ ഷൂട്ടിനും പരിശീലനത്തിനും ശേഷം ഹിന്റണിലെ വീട്ടിലേക്ക് മടങ്ങുകയായിരുന്നു ഇരുവരും. മോശം കാലാവസ്ഥയും മഞ്ഞ് വീണതിനെത്തുടർന്ന് റോഡിലുണ്ടായ വഴുക്കലുമാണ് അപകടത്തിന് കാരണമായതെന്ന് പ്രാഥമിക റിപ്പോർട്ടുകൾ സൂചിപ്പിക്കുന്നു. ഹിന്റണിലെ ഹാരി കോളിഞ്ച് ഹൈസ്കൂളിലെ പന്ത്രണ്ടാം ക്ലാസ് വിദ്യാർത്ഥികളായിരുന്നു ഇരുവരും. തങ്ങളുടെ കമ്മ്യൂണിറ്റിയിലെ തിളങ്ങുന്ന നക്ഷത്രങ്ങൾ എന്നാണ് ഇരുവരെയും പ്രാദേശിക മേയർ വിശേഷിപ്പിച്ചത്. കെയ്ല പീക്കോക്ക് അറിയപ്പെടുന്ന ഒരു ഹോക്കി താരം മാത്രമല്ല, ‘റിംബി റോഡിയോ ക്വീൻ’ കൂടിയായിരുന്നു.
ആൽബർട്ടയിലെ ഹോക്കി കമ്മ്യൂണിറ്റിയെ സംബന്ധിച്ചിടത്തോളം ഇത് ദുരന്തങ്ങളുടെ മാസമാണ്. ഫെബ്രുവരി ആദ്യവാരത്തിൽ സമാനമായ മറ്റൊരു അപകടത്തിൽ മൂന്ന് യുവ ഹോക്കി താരങ്ങൾ കൊല്ലപ്പെട്ടിരുന്നു. മൂന്നാഴ്ചയ്ക്കിടെ അഞ്ച് യുവ താരങ്ങളെയാണ് കാനഡയ്ക്ക് നഷ്ടമായത്. മരിച്ച താരങ്ങളോടുള്ള ആദരസൂചകമായി വെള്ളിയാഴ്ച നടക്കുന്ന ഹോക്കി മത്സരങ്ങളിൽ പ്രത്യേക അനുസ്മരണ ചടങ്ങുകൾ സംഘടിപ്പിച്ചിട്ടുണ്ട്. കെയ്ലയുടെയും ഡാനിക്കയുടെയും കുടുംബങ്ങളെ സഹായിക്കുന്നതിനായി ധനസമാഹരണവും (GoFundMe) ആരംഭിച്ചു.
