കാൽഗറി: കഴിഞ്ഞ വർഷം സൈബർ ആക്രമണങ്ങളിൽ വൻ വർധന രേഖപ്പെടുത്തിയതിനെത്തുടർന്ന് പ്രവിശ്യയിലെ സോഫ്റ്റ്വെയർ സംവിധാനങ്ങൾ പരിഷ്കരിക്കാനൊരുങ്ങി ആൽബർട്ട സർക്കാർ. കഴിഞ്ഞ ആഴ്ച പുറത്തിറക്കിയ പുതിയ ബജറ്റിലാണ് 4 കോടി ഡോളറിന്റെ വിപുലമായ പദ്ധതി പ്രഖ്യാപിച്ചത്. കാലപ്പഴക്കം ചെന്ന 66 ഓളം സർക്കാർ ആപ്ലിക്കേഷനുകൾ ഈ പദ്ധതിയിലൂടെ നവീകരിക്കുകയോ സുരക്ഷാ പാച്ചുകൾ (Patches) ഉപയോഗിച്ച് കൂടുതൽ കരുത്തുറ്റതാക്കുകയോ ചെയ്യും. നിലവിലെ സംവിധാനങ്ങളിലെ സുരക്ഷാ പിഴവുകൾ പരിഹരിക്കാനും ഗുരുതരമായ സൈബർ ഭീഷണികളിൽ നിന്ന് പ്രവിശ്യയെ സംരക്ഷിക്കാനും ഈ നീക്കം അനിവാര്യമാണെന്ന് ബജറ്റ് രേഖകൾ വ്യക്തമാക്കുന്നു.
സുരക്ഷാ കാരണങ്ങളാൽ ഏതൊക്കെ സോഫ്റ്റ്വെയറുകളാണ് നവീകരിക്കുന്നതെന്ന കൃത്യമായ വിവരങ്ങൾ പുറത്തുവിടാൻ ടെക്നോളജി ആൻഡ് ഇന്നൊവേഷൻ മന്ത്രാലയം തയ്യാറായിട്ടില്ല. കഴിഞ്ഞ മൂന്ന് പതിറ്റാണ്ടായി സർക്കാർ ഡിജിറ്റൽ സേവനങ്ങൾ നൽകുന്നുണ്ടെന്നും ഇതിൽ പല പ്രോഗ്രാമുകളും ഇപ്പോൾ കാലഹരണപ്പെട്ടവയാണെന്നും മന്ത്രാലയം ഇമെയിൽ പ്രസ്താവനയിലൂടെ അറിയിച്ചു. ഇത്തരം ‘ടെക്നോളജി ഡെബ്റ്റ്’ (Technology Debt) അഥവാ സാങ്കേതികമായ കാലപ്പഴക്കം ആൽബർട്ട സർക്കാരിന്റെ മാത്രം പ്രശ്നമല്ലെന്നും ആഗോളതലത്തിൽ എല്ലാ സ്ഥാപനങ്ങളും നേരിടുന്ന വെല്ലുവിളിയാണെന്നും മന്ത്രാലയം കൂട്ടിച്ചേർത്തു.
കഴിഞ്ഞ വർഷം ആൽബർട്ടയിൽ സൈബർ ആക്രമണങ്ങളിൽ ഏകദേശം 35 ശതമാനം വർധനവുണ്ടായതായാണ് കണക്കുകൾ സൂചിപ്പിക്കുന്നത്. ഏകദേശം 3,000 സൈബർ സുരക്ഷാ സംഭവങ്ങളാണ് കഴിഞ്ഞ വർഷം പ്രവിശ്യ കൈകാര്യം ചെയ്തത്. കൂടാതെ 20,000-ത്തോളം മാൽവെയർ ആക്രമണങ്ങളിൽ 97 ശതമാനവും പ്രതിരോധിക്കാൻ സർക്കാരിന് സാധിച്ചു. ബാക്കിയുള്ള മൂന്ന് ശതമാനം അക്രമങ്ങൾ സർക്കാർ ഉപകരണങ്ങളെ ബാധിച്ചെങ്കിലും അവ ഗുരുതരമായ പ്രത്യാഘാതങ്ങൾ ഉണ്ടാക്കുന്നതിന് മുൻപ് തന്നെ കണ്ടെത്തി നിയന്ത്രിക്കാൻ കഴിഞ്ഞുവെന്നും മന്ത്രാലയം അവകാശപ്പെടുന്നു.
സോഫ്റ്റ്വെയർ നവീകരണ പ്രവർത്തനങ്ങൾ വേഗത്തിലാക്കാൻ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിക്കാനും സർക്കാർ ലക്ഷ്യമിടുന്നുണ്ട്. എഐ ഉപയോഗിക്കുന്നതിലൂടെ പദ്ധതി നടപ്പിലാക്കുന്ന സമയത്തിൽ 90 ശതമാനം വരെ കുറവുണ്ടാക്കാൻ സാധിക്കുമെന്നാണ് പ്രതീക്ഷിക്കുന്നത്. സോഫ്റ്റ്വെയർ നവീകരണത്തിനുള്ള 4 കോടി ഡോളറിന് പുറമെ, പൊതുവായ സൈബർ സുരക്ഷയ്ക്കായി 1.75 കോടി ഡോളർ കൂടി ബജറ്റിൽ വകയിരുത്തിയിട്ടുണ്ട്.
