ടൊറന്റോ: കാനഡയിലെ പ്രവിശ്യകൾക്കിടയിലുള്ള വ്യാപാര തടസ്സങ്ങൾ നീക്കുന്നതിന്റെ ഭാഗമായി ഒന്റാരിയോയും നോവസ്കോഷയും മദ്യവിൽപനയ്ക്കായി ചരിത്രപരമായ കരാറിൽ ഒപ്പിട്ടു. തിങ്കളാഴ്ചയാണ് ഇരു പ്രവിശ്യകളിലെയും പ്രീമിയർമാർ ഈ പുതിയ അന്തർ-പ്രവിശ്യാ വ്യാപാര കരാർ പ്രഖ്യാപിച്ചത്. ഇതുപ്രകാരം ഇരു പ്രവിശ്യകളിലെയും താമസക്കാർക്ക് മറു പ്രവിശ്യയിലെ പ്രാദേശിക ഡിസ്റ്റിലറികൾ, വൈനറികൾ, ബ്രൂവറികൾ എന്നിവയിൽ നിന്ന് നേരിട്ട് മദ്യം വാങ്ങാൻ സാധിക്കും. നിലവിൽ ഒന്റാരിയോയിലുള്ളവർക്ക് എൽ.സി.ബി.ഒ (LCBO) വഴി ലഭിക്കുന്ന ഇനങ്ങൾ മാത്രമേ മറ്റ് പ്രവിശ്യകളിൽ നിന്ന് വാങ്ങാൻ അനുവാദമുണ്ടായിരുന്നുള്ളൂ. എന്നാൽ പുതിയ കരാർ വരുന്നതോടെ ഈ നിയന്ത്രണങ്ങളിൽ വലിയ ഇളവ് വരും.
ചൊവ്വാഴ്ച മുതൽ ഇരു പ്രവിശ്യകളിലെയും ഉൽപ്പാദകർക്ക് മറു പ്രവിശ്യയിൽ വിൽപന നടത്തുന്നതിനുള്ള അനുമതിക്കായി അപേക്ഷിച്ചു തുടങ്ങാം. ഒന്റാരിയോയിലെ ഉൽപ്പാദകർക്ക് നോവസ്കോഷ ലിക്വർ കോർപ്പറേഷന്റെയും (NSLC) നോവസ്കോഷയിലെ ഉൽപ്പാദകർക്ക് എൽ.സി.ബി.ഒയുടെയും അനുമതി ആവശ്യമാണ്. 19 വയസ്സിന് മുകളിൽ പ്രായമുള്ള ഉപഭോക്താക്കൾക്ക് തങ്ങൾക്ക് ഇഷ്ടപ്പെട്ട പാനീയങ്ങൾ കൂടുതൽ സൗകര്യപ്രദമായി വാങ്ങാൻ ഈ കരാർ സഹായിക്കുമെന്ന് പ്രീമിയർ ഡഗ് ഫോർഡിന്റെ ഓഫീസ് വാർത്താക്കുറിപ്പിൽ അറിയിച്ചു. ആഭ്യന്തര ഉൽപ്പാദകർക്ക് നീതിയുക്തമായ വിപണി ഉറപ്പാക്കുന്നതിനായി രണ്ട് പ്രവിശ്യകളിലെയും നികുതി നിരക്കുകൾക്ക് അനുസൃതമായ ഒരു പ്രത്യേക നിരക്ക് ഘടനയും നടപ്പിലാക്കും.
കാനഡയ്ക്കുള്ളിലെ സ്വതന്ത്ര വ്യാപാരത്തിന് ഒന്റാരിയോ നേതൃത്വം നൽകുകയാണെന്നും പ്രാദേശിക ബിസിനസ്സുകളെ പിന്തുണയ്ക്കേണ്ടത് ഏറെ പ്രധാനമാണെന്നും പ്രീമിയർ ഡഗ് ഫോർഡ് പറഞ്ഞു. ഇതിനോടകം തന്നെ 10 മറ്റ് മേഖലകളുമായും ഒന്റാരിയോ ഇത്തരത്തിലുള്ള ധാരണാപത്രങ്ങളിൽ ഒപ്പിട്ടിട്ടുണ്ട്. 2026 മെയ് മാസത്തോടെ കാനഡയിലുടനീളം മദ്യത്തിന്റെ നേരിട്ടുള്ള വിൽപന നടപ്പിലാക്കുകയാണ് സർക്കാരിന്റെ ലക്ഷ്യം.
