മുംബൈ: മ്യൂച്വൽ ഫണ്ട് രംഗത്ത് വിപ്ലവകരമായ മാറ്റങ്ങൾക്കൊരുങ്ങി മൂലധന വിപണി നിയന്ത്രണ ഏജൻസിയായ സെബി (SEBI). ഒരേ ഫണ്ട് ഹൗസിന് കീഴിലുള്ള വിവിധ സ്കീമുകൾ ഒരേ ഓഹരികളിൽ നിക്ഷേപിക്കുന്നത് (Portfolio Overlap) നിയന്ത്രിക്കാനാണ് പുതിയ നീക്കം. ഇത് പ്രകാരം, രണ്ട് ഫണ്ടുകൾ തമ്മിലുള്ള ഓഹരി സാമ്യം 50 ശതമാനത്തിൽ കൂടുതലാകാൻ പാടില്ലെന്ന നിയമം വരും. പലപ്പോഴും ഒരേ കമ്പനിയുടെ തന്നെ വ്യത്യസ്ത മ്യൂച്വൽ ഫണ്ട് സ്കീമുകൾ ഒരേ ഓഹരികളിലും സെക്ടറുകളിലുമാണ് പണം നിക്ഷേപിക്കാറുള്ളത്. ഇത് നിക്ഷേപകന് യഥാർത്ഥ വൈവിധ്യവൽക്കരണത്തിന്റെ ഗുണം ഇല്ലാതാക്കുന്നു. ഇത് ഒഴിവാക്കാനാണ് സെബി പുതിയ കർശന നിയന്ത്രണങ്ങൾ ഏർപ്പെടുത്തിയത്. ഒരു ഫണ്ട് ഹൗസിലെ രണ്ട് ഇക്വിറ്റി ഫണ്ടുകൾ തമ്മിലുള്ള പോർട്ട്ഫോളിയോ ഓവർലാപ്പ് 50 ശതമാനത്തിന് മുകളിൽ പോകരുതെന്നാണ് പ്രധാന നിർദ്ദേശം. മൂന്ന് വർഷത്തിനുള്ളിൽ ഈ പരിധി പാലിക്കാൻ കഴിയാത്ത ഫണ്ടുകൾ നിർബന്ധമായും മറ്റ് സ്കീമുകളുമായി ലയിപ്പിക്കേണ്ടി വരും. ലാർജ്-ക്യാപ് ഫണ്ടുകളെ ഈ പരിധിയിൽ നിന്ന് ഒഴിവാക്കിയിട്ടുണ്ട്. കാരണം ഇവ വിപണിയിലെ ആദ്യ 100 കമ്പനികളിൽ മാത്രം നിക്ഷേപിക്കാൻ ബാധ്യസ്ഥരായതിനാൽ ഓവർലാപ്പ് സ്വാഭാവികമാണ്. ഇനി മുതൽ എല്ലാ ഫണ്ട് ഹൗസുകളും തങ്ങളുടെ സ്കീമുകൾ തമ്മിലുള്ള ഓവർലാപ്പ് ശതമാനം എല്ലാ മാസവും വെബ്സൈറ്റിലൂടെ പ്രസിദ്ധീകരിക്കണമെന്നും നിയമത്തിൽ പറയുന്നു.
ഒരേ ഫണ്ട് ഹൗസിന്റെ ഒന്നിലധികം ഫണ്ടുകളിൽ നിക്ഷേപിച്ചിട്ടുണ്ടെങ്കിൽ, അവ ഒരേ ഓഹരികളിലാണോ പണം ഇടുന്നതെന്ന് ഇനി എളുപ്പത്തിൽ അറിയാം. ഓവർലാപ്പ് അധികമുള്ള ഫണ്ടുകൾ ലയിപ്പിക്കപ്പെടുമ്പോൾ, നിങ്ങളുടെ നിക്ഷേപം പുതിയൊരു സ്കീമിലേക്ക് മാറാൻ സാധ്യതയുണ്ട്. ഒരേ തരം ഓഹരികൾക്കായി പല ഫണ്ടുകൾക്ക് എക്സ്പെൻസ് റേഷ്യോ നൽകുന്നത് ഒഴിവാക്കാൻ ഈ നിയമം നിക്ഷേപകരെ സഹായിക്കും. പുതിയ നിക്ഷേപം തുടങ്ങുന്നതിന് മുൻപ് രണ്ട് ഫണ്ടുകൾ തമ്മിലുള്ള ഓവർലാപ്പ് എത്രയുണ്ടെന്ന് പരിശോധിക്കുക. ഒരേ സെക്ടറിലോ ഒരേ ഓഹരികളിലോ അമിതമായി നിക്ഷേപിക്കുന്നത് റിസ്ക് വർദ്ധിപ്പിക്കും. അതേ പോലെ പോർട്ട്ഫോളിയോ പുനഃക്രമീകരിക്കാൻ ആഗ്രഹിക്കുന്നെങ്കിൽ നല്ലൊരു അവസരമാണ് സെബി ഒരുക്കിയത്.
