ഓട്ടവ : ഒൻ്റാരിയോ ട്രിലിയം ബെനിഫിറ്റ് (OTB) പേയ്മെൻ്റ് ഇന്ന് മുതൽ (മാർച്ച് 10 ചൊവ്വാഴ്ച) യോഗ്യരായ കനേഡിയൻ പൗരന്മാരുടെ ബാങ്ക് അക്കൗണ്ടുകളിൽ എത്തും. വർധിച്ചുവരുന്ന ഊർജ്ജ ചെലവുകൾ, പ്രോപ്പർട്ടി ടാക്സ്, ദൈനംദിന ചെലവുകൾ എന്നിവയുമായി മല്ലിടുന്ന ലക്ഷക്കണക്കിന് താഴ്ന്നതും ഇടത്തരം വരുമാനമുള്ളതുമായ ഒൻ്റാരിയോ നിവാസികൾക്ക് ഈ നികുതി രഹിത പ്രതിമാസ പേയ്മെൻ്റ് ആശ്വാസമാകും. ഒൻ്റാരിയോ സെയിൽസ് ടാക്സ് ക്രെഡിറ്റ് (OSTC), നോർത്തേൺ ഒൻ്റാരിയോ എനർജി ക്രെഡിറ്റ് (NOEC), ഒൻ്റാരിയോ എനർജി ആൻഡ് പ്രോപ്പർട്ടി ടാക്സ് ക്രെഡിറ്റുകൾ (OEPTC) എന്നീ മൂന്ന് ക്രെഡിറ്റുകൾ കൂടിച്ചേരുന്നതാണ് OTB.
നാല് പേരടങ്ങുന്ന യോഗ്യരായ കുടുംബത്തിന് പരമാവധി 3,230 ഡോളർ വരെ ലഭിക്കും. ഒരു വ്യക്തിക്ക് അവരുടെ പ്രായം, വരുമാനം, താമസിക്കുന്ന സ്ഥലം, കുടുംബാംഗങ്ങളുടെ എണ്ണം, വാടകയോ വസ്തുനികുതിയോ അടച്ച തുക എന്നിവയെ ആശ്രയിച്ചാണ് ഒൻ്റാരിയോ ട്രില്ലിയം ബെനിഫിറ്റ് കണക്കാക്കുയെന്ന് കാനഡ റവന്യൂ ഏജൻസി അറിയിച്ചു. എന്നാൽ, ഒരു വ്യക്തിക്കോ കുടുംബത്തിനോ നൽകുന്ന OTB വാർഷിക പേയ്മെൻ്റ് 371 ഡോളറോ അതിൽ കുറവോ ആണെങ്കിൽ ഒറ്റത്തവണയായി പേയ്മെൻ്റ് വിതരണം ചെയ്യാറുണ്ട്. ഇത് സാധാരണ ജൂലൈ മാസത്തിലാണ് വിതരണം ചെയ്യുക. ഏപ്രിൽ 10, മെയ് 8, ജൂൺ 10, ജൂലൈ 10, ഓഗസ്റ്റ് 10, സെപ്റ്റംബർ 10, ഒക്ടോബർ 9, നവംബർ 10, ഡിസംബർ 10 എന്നീ തീയതികളിലായിരിക്കും ഇനി ഒൻ്റാരിയോ ട്രിലിയം ബെനിഫിറ്റ് വിതരണം ചെയ്യുന്നത്.
