മൺട്രിയോൾ : മാസങ്ങളായി തുടരുന്ന ഊഹാപോഹങ്ങൾക്ക് വിരാമമിട്ട് മുൻ ഫെഡറൽ മന്ത്രി പാബ്ലോ റോഡ്രിഗസിന്റെ കെബെക്ക് ലിബറൽ പാർട്ടി നേതൃത്വ മത്സരത്തെക്കുറിച്ച് അന്വേഷണം ആരംഭിച്ചതായി ഇലക്ഷൻസ് കെബെക്ക് അറിയിച്ചു. അതേസമയം അന്വേഷണം എപ്പോൾ ആരംഭിച്ചുവെന്ന് ഏജൻസി വ്യക്തമാക്കിയിട്ടില്ല. നിരവധി മാധ്യമങ്ങൾ റിപ്പോർട്ട് ചെയ്തതുപോലെ, കെബെക്ക് ലിബറൽ പാർട്ടി നേതൃത്വ മത്സരത്തെക്കുറിച്ച് അന്വേഷണം ആരംഭിച്ചതായി ഇലക്ഷൻസ് കെബെക്ക് വക്താവ് ജൂലി സെൻ്റ്-അർനൗഡ് ഡ്രോലെറ്റ് അറിയിച്ചു. എന്നാൽ അന്വേഷണത്തെക്കുറിച്ച് കൂടുതൽ വിവരങ്ങൾ പുറത്തുവിട്ടിട്ടില്ല. കെബെക്ക് അഴിമതി വിരുദ്ധ സ്ക്വാഡിന്റെ (യൂണിറ്റ് പെർമനൻ്റ് ആൻ്റികറപ്ഷൻ – യുപിഎസി) അന്വേഷണത്തിന് പുറമെയാണിത്.
റോഡ്രിഗസിന്റെ നേതൃത്വ പ്രചാരണത്തിലെ ധനസഹായത്തിലുണ്ടായ ക്രമക്കേടുകൾ പുറത്തുവന്നതോടെ അദ്ദേഹത്തിന്റെ രാജിയിൽ കലാശിച്ചിരുന്നു. നവംബറിൽ, റോഡ്രിഗസിന് വോട്ട് ചെയ്യാൻ പാർട്ടി അംഗങ്ങൾക്ക് പണം വാഗ്ദാനം ചെയ്തതായുള്ള ടെക്സ്റ്റ് സന്ദേശങ്ങളെക്കുറിച്ച് ജേണൽ ഡി മൺട്രിയോൾ റിപ്പോർട്ട് ചെയ്തിരുന്നു. നിയമവിരുദ്ധമായ ഒന്നും നടന്നിട്ടില്ലെന്നും മറച്ചുവെക്കാനൊന്നുമില്ലെന്നും റോഡ്രിഗസ് നിരന്തരം വാദിച്ചു. എന്നാൽ, മത്സരത്തിൽ വിജയിച്ച് ആറ് മാസത്തിന് ശേഷം ഡിസംബർ 17 ന് അദ്ദേഹം ഒടുവിൽ സ്ഥാനമൊഴിഞ്ഞു.
