വാഷിങ്ടണ്: ഹോര്മുസ് കടലിടുക്കിലൂടെയുള്ള കപ്പല് ഗതാഗതം 48 മണിക്കൂറിനുള്ളില് ഇറാന് പുനഃസ്ഥാപിച്ചില്ലെങ്കില്, രാജ്യത്തെ വൈദ്യുതി നിലയങ്ങള് ആക്രമിച്ച് ഇല്ലാതാക്കുമെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ് കടുത്ത മുന്നറിയിപ്പ് നല്കി. ‘ഭീഷണിയില്ലാതെ ജലപാത പൂര്ണ്ണമായും തുറന്നില്ലെങ്കില്, ഇറാനിലെ ഏറ്റവും വലിയ പവര് പ്ലാന്റ് മുതല് ആക്രമിച്ച് തുടങ്ങും,’ എന്ന് ട്രംപ് സോഷ്യല് മീഡിയയിലൂടെ വ്യക്തമാക്കി.
ലോകത്തെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഹോര്മുസ് കടലിടുക്ക് ഇറാന് ഭാഗികമായി തടഞ്ഞത് ആഗോള ഊര്ജ്ജ വിപണിയെ വന്തോതില് ബാധിച്ചിട്ടുണ്ട്. ഇതിനിടെ, യുഎസ്-ഇസ്രായേല് സഖ്യത്തെ സഹായിക്കാന് മടിക്കുന്ന നാറ്റോ (NATO) അംഗരാജ്യങ്ങളെ ട്രംപ് രൂക്ഷമായി വിമര്ശിച്ചു. അമേരിക്കയുടെ പിന്തുണയില്ലാതെ നാറ്റോ വെറുമൊരു ‘കടലാസ് കടുവ’ (Paper Tiger) മാത്രമാണെന്നും സഖ്യകക്ഷികള് ഭീരുക്കളാണെന്നും അദ്ദേഹം ആരോപിച്ചു.
യുദ്ധം ആരംഭിച്ച ശേഷം ആദ്യമായി ഇറാന് ദീര്ഘദൂര മിസൈലുകള് പ്രയോഗിച്ചതായി ഇസ്രായേല് സ്ഥിരീകരിച്ചു. ഡീഗോ ഗാര്സിയയിലെ യുഎസ്-യുകെ സൈനിക താവളത്തിന് നേരെ 4,000 കിലോമീറ്റര് പരിധിയുള്ള രണ്ട് ബാലിസ്റ്റിക് മിസൈലുകള് ഇറാന് വിക്ഷേപിച്ചു. ഈ മിസൈലുകള്ക്ക് യൂറോപ്യന് നഗരങ്ങളായ ബെര്ലിന്, പാരീസ്, റോം എന്നിവയെ ലക്ഷ്യം വെക്കാന് ശേഷിയുണ്ടെന്ന് ഇസ്രയേല് സൈനിക മേധാവി ഇയാല് സമീര് ചൂണ്ടിക്കാട്ടി.
ഫെബ്രുവരി 28-ന് ആക്രമണം ആരംഭിച്ച ശേഷം ഇറാനില് ഇതുവരെ 2,000-ത്തിലധികം പേര് കൊല്ലപ്പെട്ടതായാണ് റിപ്പോര്ട്ടുകള്. ഇറാന്റെ മിസൈല് ആക്രമണങ്ങളില് ഇസ്രായേലില് 15 പേര് കൊല്ലപ്പെടുകയും ഡിമോണയിലെ ആണവ കേന്ദ്രത്തിന് സമീപമുണ്ടായ ആക്രമണത്തില് നൂറിലേറെ പേര്ക്ക് പരിക്കേല്ക്കുകയും ചെയ്തു. ബ്രിട്ടന്, ജര്മ്മനി, ജപ്പാന് ഉള്പ്പെടെയുള്ള രാജ്യങ്ങള് ഹോര്മുസ് കടലിടുക്കില് സമാധാനം ഉറപ്പാക്കാന് സൈനികേതര നീക്കങ്ങള്ക്ക് തയ്യാറാണെന്ന് അറിയിച്ചിട്ടുണ്ട്.
