മൺട്രിയോൾ : കെബെക്കിൽ സർക്കാർ ഉദ്യോഗസ്ഥർ ജോലിസമയത്ത് മതപ്രതീകങ്ങൾ ഉപയോഗിക്കുന്നത് വിലക്കുന്ന ‘ബിൽ 21’ നിയമത്തിനെതിരെയുള്ള ഹർജി സുപ്രീം കോടതിയിൽ വിചാരണ ആരംഭിച്ചു. തിങ്കളാഴ്ച ആരംഭിച്ച വാദം കേൾക്കൽ നാലു ദിവസം നീണ്ടുനിൽക്കും. 2019-ൽ പ്രാബല്യത്തിൽ വന്ന ഈ നിയമത്തിന്റെ നിയമസാധുതയും ഭരണഘടനാപരമായ നിലനിൽപ്പുമാണ് കോടതി പ്രധാനമായും പരിശോധിക്കുന്നത്.
അധികാരസ്ഥാനങ്ങൾ വഹിക്കുന്ന പൊതുമേഖലാ ജീവനക്കാർ, അധ്യാപകർ തുടങ്ങിയവർ ഡ്യൂട്ടിയിലായിരിക്കുമ്പോൾ ഹിജാബ്, കുരിശ്, ടർബൻ തുടങ്ങിയ മതപ്രതീകങ്ങൾ ധരിക്കുന്നത് തടയുന്നതാണ് വിവാദമായ ഈ നിയമം. ഇംഗ്ലീഷ് മൺട്രിയോൾ സ്കൂൾ ബോർഡ്, വിവിധ സാമൂഹിക സംഘടനകൾ, അധ്യാപക യൂണിയനുകൾ എന്നിവർ സംയുക്തമായാണ് ഈ നിയമത്തെ വെല്ലുവിളിച്ചത്. കീഴ്ക്കോടതികൾ നേരത്തെ ഈ നിയമത്തെ ശരിവെച്ചിരുന്നുവെങ്കിലും പൗരാവകാശങ്ങൾ ലംഘിക്കപ്പെടുന്നു എന്ന വാദമുയർത്തിയാണ് ഹർജിക്കാർ സുപ്രീം കോടതിയെ സമീപിച്ചത്.
ഭരണഘടനയിലെ ‘നോട്ട്വിഥ്സ്റ്റാൻഡിംഗ് ക്ലോസ്’ (സെക്ഷൻ 33) ഉപയോഗിച്ച് കോടതി ഇടപെടലുകളിൽ നിന്ന് നിയമത്തെ സംരക്ഷിക്കാനാണ് കെബെക്ക് സർക്കാർ ശ്രമിക്കുന്നത്. എന്നാൽ ഈ അധികാരം ദുരുപയോഗം ചെയ്യുകയാണെന്ന് ഹർജിക്കാർ ആരോപിക്കുന്നു. വാദത്തിനിടെ, ഇത് നിഷ്പക്ഷതയല്ല മറിച്ച് നിയമപരമായ വേർതിരിവാണെന്ന് അധ്യാപക പ്രതിനിധികൾ കോടതിക്ക് പുറത്ത് മാധ്യമങ്ങളോട് പ്രതികരിച്ചു. ഫെഡറൽ സർക്കാരും വിവിധ പ്രവിശ്യകളും കേസിൽ കക്ഷി ചേർന്നിട്ടുണ്ട്.
ബിൽ 21-ന് പിന്നാലെ സ്കൂൾ ജീവനക്കാർക്കും വോളന്റിയർമാർക്കും നിയന്ത്രണം ഏർപ്പെടുത്തുന്ന ബിൽ 94 ഉൾപ്പെടെയുള്ള കർശന നിയമങ്ങൾ കെബെക്ക് നടപ്പിലാക്കിയിരുന്നു. ഈ കേസിലെ വിധി ആൽബർട്ട, ഒന്റാരിയോ തുടങ്ങിയ മറ്റ് പ്രവിശ്യകളിലെ സമാന നിയമനീക്കങ്ങളെയും ബാധിക്കുമെന്നതിനാൽ രാജ്യം ഉറ്റുനോക്കുന്ന ഒന്നായി ഇത് മാറിയിരിക്കുകയാണ്. വരും ദിവസങ്ങളിൽ കെബെക്ക് സർക്കാരിന്റെയും മറ്റ് അനുകൂല സംഘടനകളുടെയും വാദങ്ങൾ കോടതി കേൾക്കും.
