ടൊറന്റോ: ഡിസംബറിലെ അവധിക്കാലത്തിന് ശേഷം ഒന്റാരിയോ നിയമസഭ പുനരാരംഭിച്ച ആദ്യ ദിനം തന്നെ പ്രീമിയർ ഡഗ് ഫോർഡിന്റെ ഫോൺ റെക്കോർഡുകളെച്ചൊല്ലിയുള്ള തർക്കം സഭയിൽ വൻ പ്രതിഷേധത്തിന് വഴിയൊരുക്കി. പ്രീമിയർ, കാബിനറ്റ് മന്ത്രിമാർ, അവരുടെ ജീവനക്കാർ എന്നിവരുടെ ഫോൺ വിവരങ്ങൾ വിവരാവകാശ നിയമത്തിന്റെ (FOI) പരിധിയിൽ നിന്ന് ഒഴിവാക്കുന്നതിനുള്ള പുതിയ ബിൽ കൊണ്ടുവരാനുള്ള സർക്കാർ നീക്കമാണ് വിവാദങ്ങൾക്ക് ആധാരം. പ്രീമിയർക്ക് എന്തോ ഒളിപ്പിക്കാനുണ്ടെന്ന് ആരോപിച്ച പ്രതിപക്ഷം, സുതാര്യത ഉറപ്പാക്കണമെന്ന ആവശ്യത്തിൽ ഉറച്ചുനിൽക്കുകയാണ്.
പുതിയ നിയമനിർമ്മാണത്തിലൂടെ പ്രീമിയറുടെയും മറ്റ് ഉന്നത ഉദ്യോഗസ്ഥരുടെയും ഫോൺ രേഖകൾ പൊതുജനങ്ങൾക്ക് ലഭ്യമാകുന്നത് തടയാനാണ് സർക്കാർ ലക്ഷ്യമിടുന്നത്. എന്നാൽ ഇത് ജനാധിപത്യ വിരുദ്ധമാണെന്നും നിയമം മുൻകാല പ്രാബല്യത്തോടെ നടപ്പിലാക്കുന്നത് വിവരങ്ങൾ മറച്ചുവെക്കാനാണെന്നും എൻഡിപി നേതാവ് മാരിറ്റ് സ്റ്റൈൽസ് ആരോപിച്ചു. പ്രീമിയറുടെ ഔദ്യോഗിക കാര്യങ്ങൾക്കായി ഉപയോഗിക്കുന്ന സ്വകാര്യ ഫോണിലെ വിവരങ്ങൾ പുറത്തുവിടണമെന്ന് ഇൻഫർമേഷൻ ആൻഡ് പ്രൈവസി കമ്മീഷണർ നേരത്തെ ഉത്തരവിട്ടിരുന്നു. ഇതിനെതിരെ സർക്കാർ കോടതിയെ സമീപിച്ചെങ്കിലും തിരിച്ചടി നേരിട്ടിരുന്നു. ഇതിന് പിന്നാലെയാണ് നിയമത്തിൽ തന്നെ മാറ്റം വരുത്താൻ ഫോർഡ് സർക്കാർ ഒരുങ്ങുന്നത്.
തന്റെ ഫോൺ വിവരങ്ങൾ പരസ്യപ്പെടുത്തുന്നത് സഹായത്തിനായി തന്നെ ബന്ധപ്പെടുന്ന സാധാരണക്കാരുടെ വ്യക്തിഗത വിവരങ്ങളെയും ആരോഗ്യവിവരങ്ങളെയും ബാധിക്കുമെന്ന് ഡഗ് ഫോർഡ് സഭയിൽ വാദിച്ചു. മറ്റ് പ്രവിശ്യകൾ ഇതിനോടകം നടപ്പിലാക്കിയ മാതൃകയാണിതെന്നും അദ്ദേഹം കൂട്ടിച്ചേർത്തു. “മാധ്യമങ്ങളും പ്രതിപക്ഷവും മാത്രമാണ് ഇതിനെക്കുറിച്ച് ആശങ്കപ്പെടുന്നത്. ബാക്കിയുള്ളവർ സമ്പദ്വ്യവസ്ഥയെയും തൊഴിലവസരങ്ങളെയും കുറിച്ചാണ് ചിന്തിക്കുന്നത്,” എന്നായിരുന്നു ഫോർഡിന്റെ മറുപടി. എന്നാൽ, വ്യക്തിവിവരങ്ങൾ നിലവിലുള്ള നിയമപ്രകാരം തന്നെ സംരക്ഷിതമാണെന്നും പ്രീമിയറുടെ വാദം തെറ്റാണെന്നും പ്രൈവസി കമ്മീഷണർ നേരത്തെ വ്യക്തമാക്കിയിട്ടുണ്ട്.
അവിഹിത സ്വാധീനങ്ങളും അഴിമതികളും മറച്ചുവെക്കാനാണ് ഈ നിയമഭേദഗതിയെന്ന് ഗ്രീൻ പാർട്ടി നേതാവ് മൈക്ക് ഷ്രൈനർ കുറ്റപ്പെടുത്തി. ഗ്രീൻബെൽറ്റ് അഴിമതി ഉൾപ്പെടെയുള്ള മുൻകാല വിവാദങ്ങൾ പരാമർശിച്ച അദ്ദേഹം, പ്രീമിയർ ആരുമായാണ് സംസാരിക്കുന്നതെന്നും ആരെല്ലാമാണ് ഭരണപരമായ തീരുമാനങ്ങളിൽ സ്വാധീനം ചെലുത്തുന്നതെന്നും അറിയാൻ ജനങ്ങൾക്ക് അവകാശമുണ്ടെന്ന് ഓർമ്മിപ്പിച്ചു. സ്പീക്കറുടെ പ്രത്യേക വാറന്റ് മുഖേന ഫോൺ രേഖകൾ പിടിച്ചെടുക്കാനുള്ള നീക്കത്തിലാണ് നിലവിൽ പ്രതിപക്ഷം. ഒന്റാറിയോ രാഷ്ട്രീയത്തിൽ വരും ദിവസങ്ങളിലും ഈ വിഷയം ശക്തമായ വാദപ്രതിവാദങ്ങൾക്ക് കാരണമാകുമെന്ന് ഉറപ്പായിട്ടുണ്ട്.
