കാനഡയിലെ പ്രമുഖ വിമാനക്കമ്പനിയായ വെസ്റ്റ്ജെറ്റിലെ ഫ്ലൈറ്റ് അറ്റൻഡന്റുമാർ ഞായറാഴ്ച പുലർച്ചെ സമരത്തിലേക്ക് നീങ്ങിയതോടെ രാജ്യത്തെ വിമാന സർവീസുകൾക്ക് വലിയ തിരിച്ചടി. ഫ്ലൈറ്റ് അറ്റൻഡന്റുമാരെ പ്രതിനിധീകരിക്കുന്ന CUPE (Canadian Union of Public Employees)യുടെ ചർച്ചാ സമിതിയും വെസ്റ്റ്ജെറ്റും പുതിയ കൂട്ടായ കരാറിൽ ധാരണയിലെത്താൻ കഴിയാതിരുന്നതിനെ തുടർന്നാണ് സമരം ആരംഭിച്ചത്. തിരക്കേറിയ വേനൽക്കാല യാത്രാ വാരാന്ത്യത്തിൽ തന്നെ വെസ്റ്റ്ജെറ്റ് എല്ലാ വിമാന സർവീസുകളും നിർത്തിവെച്ചു.
കാൾഗറിയിൽ ഞായറാഴ്ച രാവിലെ മാധ്യമങ്ങളോട് സംസാരിച്ച CUPE റെക്കോർഡിംഗ് സെക്രട്ടറി കാമറൺ ജോൺസ്, യൂണിയനും കമ്പനിയും വീണ്ടും ചർച്ചാ ടേബിളിലേയ്ക്ക് മടങ്ങിയതായി അറിയിച്ചു. ഫ്ലൈറ്റ് അറ്റൻഡന്റുമാർക്ക് നീതിയുക്തമായ കരാർ ലഭിക്കുന്നതിനായി ചർച്ചകൾ തുടരുകയാണെന്നും, കാനഡ ലേബർ കോഡ് പ്രകാരമുള്ള ചർച്ചാ നടപടികൾ മുന്നോട്ട് പോകാൻ തൊഴിൽ മന്ത്രി പാറ്റി ഹാജു അനുവദിക്കണമെന്നാണ് പ്രതീക്ഷയെന്നും അദ്ദേഹം പറഞ്ഞു. 2025ലെ എയർ കാനഡ ഫ്ലൈറ്റ് അറ്റൻഡന്റുമാരുടെ സമരത്തിനിടെ മന്ത്രി ഹാജു നിർബന്ധിത ആർബിട്രേഷൻ ഏർപ്പെടുത്തിയിരുന്നു. എന്നാൽ ഇത്തവണ ചർച്ചകളിൽ സർക്കാർ ഇടപെടാതെ ഇരുപക്ഷവും കരാർ കണ്ടെത്തണമെന്നാണ് യൂണിയന്റെ ആവശ്യം.
അതേസമയം, സമരം നിരാശാജനകമാണെന്ന് തൊഴിൽ മന്ത്രി പാറ്റി ഹാജു പ്രതികരിച്ചു. സമരമോ ലോക്ക്ഔട്ടോ ഉണ്ടായാലും കരാറിലെത്താനുള്ള സാധ്യത അവസാനിക്കുന്നില്ലെന്നും, ഇരുപക്ഷവും ചർച്ചാ ടേബിളിൽ പരമാവധി ശ്രമിച്ച് ധാരണയിലെത്തണമെന്നും മന്ത്രി പറഞ്ഞു. വെസ്റ്റ്ജെറ്റും യൂണിയനും തമ്മിലുള്ള കരാർ ചർച്ചകൾ കാലഗറിയിൽ ഏറെ നാളായി തുടരുകയായിരുന്നു. 2025 ഡിസംബർ 31ന് നിലവിലെ കരാർ കാലഹരണപ്പെട്ടതിനു ശേഷം ശമ്പളവും ഗ്രൗണ്ട് ഡ്യൂട്ടിക്ക് ലഭിക്കുന്ന പ്രതിഫലവുമാണ് പ്രധാന തർക്കവിഷയങ്ങളിലൊന്ന്.
വെസ്റ്റ്ജെറ്റിന്റെ ഏറ്റവും പുതിയ ഓഫറിൽ 2026 ഒക്ടോബർ മുതൽ 13 ശതമാനം ശമ്പള വർധനയും, 2026 ജനുവരി 1 മുതൽ പ്രാബല്യത്തിലുള്ള കുടിശ്ശികയും ഉൾപ്പെടുന്നതായി കമ്പനി അറിയിച്ചു. കൂടാതെ ശമ്പളത്തിന് തുല്യമായി കണക്കാക്കുമ്പോൾ 12 ശതമാനം അധിക മൂല്യമുള്ള പുതിയ ഡ്യൂട്ടി പേ പ്രീമിയം, ഉടൻ പ്രാബല്യത്തിൽ വരുന്ന 13 ശതമാനം പെർ ഡയിം വർധന, പ്രതിവർഷം 300 ഡോളറിന്റെ ആരോഗ്യ ചെലവ് അക്കൗണ്ട്, കൂടുതൽ അവധി, 17 ആഴ്ചത്തെ പ്രസവാനന്തര മെറ്റേണിറ്റി ലീവ് ടോപ്പ്-അപ്പ് എന്നിവയും കമ്പനി വാഗ്ദാനം ചെയ്തിട്ടുണ്ട്. ഡ്യൂട്ടി ദിവസങ്ങളുടെ പരമാവധി പരിധി കുറയ്ക്കൽ, കൂടുതൽ വിശ്രമ സമയം, റീഅസൈൻമെന്റുകൾക്കും ലേയോവർ ഹോട്ടൽ വൈകലുകൾക്കും അധിക വേതനം തുടങ്ങിയ സൗകര്യങ്ങളും ഓഫറിൽ ഉൾപ്പെടുത്തിയിട്ടുണ്ട്. സമരം മൂലം ബാധിക്കപ്പെട്ട യാത്രക്കാർക്ക് സാഹചര്യാനുസരിച്ച് റീഫണ്ട് നൽകുകയോ മറ്റ് വിമാനങ്ങളിൽ യാത്ര പുനഃക്രമീകരിക്കുകയോ ചെയ്യുമെന്ന് വെസ്റ്റ്ജെറ്റ് അറിയിച്ചു.
