ടൊറന്റോ: ടൊറന്റോ നഗരത്തിലെ പ്രധാന ഡൗൺടൗൺ ബൈക്ക് പാതകൾ നീക്കം ചെയ്യാനുള്ള ഒന്റാരിയോ സർക്കാരിന്റെ നീക്കത്തിന് കോടതിയുടെ അംഗീകാരം. ബൈക്ക് പാതകൾ നീക്കം ചെയ്യുന്നത് കാനഡയുടെ ചാർട്ടർ അവകാശങ്ങളുടെ ലംഘനമല്ലെന്ന് ഒന്റാരിയോ അപ്പീൽ കോടതി വിധിച്ചു.
പ്രീമിയർ ഡഗ് ഫോർഡ് സർക്കാരിന് വലിയ രാഷ്ട്രീയ-നിയമ വിജയമായാണ് വെള്ളിയാഴ്ച പുറത്തുവന്ന വിധിയെ വിലയിരുത്തുന്നത്. നേരത്തെ സുപ്പീരിയർ കോടതി ജസ്റ്റിസ് പോൾ ഷാബാസ് സർക്കാരിന്റെ നടപടി ഭരണഘടനാവിരുദ്ധമാണെന്ന് കണ്ടെത്തിയിരുന്നു. ആ വിധിയാണ് അപ്പീൽ കോടതി ഇപ്പോൾ മറികടന്നത്.
ബ്ലോർ സ്ട്രീറ്റ്, യൂണിവേഴ്സിറ്റി അവന്യൂ, യോംഗ് സ്ട്രീറ്റ് എന്നിവിടങ്ങളിലെ മൂന്ന് ബൈക്ക് പാതകളാണ് കേസിന്റെ കേന്ദ്രവിഷയം. ഇവ നീക്കം ചെയ്യാനുള്ള നിയമനിർമാണം നടപ്പാക്കുന്നതിലൂടെ സൈക്കിൾ യാത്രക്കാരുടെ സുരക്ഷയുമായി ബന്ധപ്പെട്ട അവകാശങ്ങൾ ലംഘിക്കപ്പെടുന്നുവെന്നായിരുന്നു ഹർജിക്കാരുടെ വാദം.
എന്നാൽ, ബൈക്ക് പാതകൾ നീക്കം ചെയ്യാനുള്ള സർക്കാരിന്റെ തീരുമാനം ചാർട്ടർ അവകാശങ്ങൾ ലംഘിക്കുന്നില്ലെന്നാണ് അപ്പീൽ കോടതിയുടെ നിലപാട്. അതേസമയം, ഈ വിധി ടൊറന്റോയിലെ എല്ലാ ബൈക്ക് പാതകളും നീക്കം ചെയ്യാൻ നഗരത്തിനോ പ്രവിശ്യയ്ക്കോ അനുമതി നൽകുന്നതല്ലെന്നും കോടതി വ്യക്തമാക്കിയിട്ടുണ്ട്.
വിധിയോടെ ഡഗ് ഫോർഡ് സർക്കാരിന് ടൊറന്റോയുടെ ഗതാഗത നയത്തിൽ വലിയ മാറ്റങ്ങൾ കൊണ്ടുവരാനുള്ള വഴി കൂടുതൽ വ്യക്തമായിരിക്കുകയാണ്. അതേസമയം, ബൈക്ക് യാത്രക്കാരുടെ സുരക്ഷയും നഗരത്തിലെ ഗതാഗതക്കുരുക്കും സംബന്ധിച്ച ചർച്ചകൾ തുടരുമെന്നാണ് പ്രതീക്ഷിക്കുന്നത്.
