ടൊറന്റോ: ഒന്റാരിയോയിൽ ജൂത ആരാധനാലയമായ സിനഗോഗിന് സമീപമുണ്ടായ വെടിവെപ്പിൽ ഒരു പൊലീസ് ഉദ്യോഗസ്ഥനും അക്രമിയെന്ന് സംശയിക്കുന്നയാൾക്കും പരുക്കേറ്റു. ഒന്റാരിയോയിലെ ബെല്ലെവില്ലെയിലുള്ള ‘സൺസ് ഓഫ് ജേക്കബ്’ (Sons of Jacob) സിനഗോഗിന് സമീപം ഞായറാഴ്ച വൈകുന്നേരമാണ് സംഭവം നടന്നത്. ജൂത സമൂഹത്തിന്റെ വിശുദ്ധ ദിനമായ യോം കിപ്പൂർ (Yom Kippur) പ്രാർത്ഥനകൾക്കായി ആളുകൾ ഒത്തുകൂടിയ സമയത്തായിരുന്നു ഈ അക്രമം.
പ്രാദേശിക സമയം വൈകുന്നേരം 7:10 ഓടെ സിനഗോഗിന് സമീപം സംശയാസ്പദമായ സാഹചര്യത്തിൽ സായുധനായ ഒരാളെ പൊലീസ് കണ്ടെത്തുകയായിരുന്നു. തുടർന്നുണ്ടായ വെടിവെപ്പിലാണ് ബെല്ലെവില്ലെ പൊലീസ് ഉദ്യോഗസ്ഥനും അക്രമിക്കും പരുക്കേറ്റത്. ഇരുവരെയും ഉടൻ തന്നെ ആശുപത്രിയിൽ പ്രവേശിപ്പിച്ചു. അക്രമിയുടെ പരുക്ക് അതീവ ഗുരുതരമാണെന്നാണ് റിപ്പോർട്ടുകൾ.
വെടിവെപ്പ് നടക്കുമ്പോൾ സിനഗോഗിനുള്ളിൽ കുട്ടികളടക്കം ഇരുപത്തഞ്ചോളം പേർ ഉണ്ടായിരുന്നുവെങ്കിലും അവർ സുരക്ഷിതരാണെന്നും ഉള്ളിലുള്ള ആർക്കും പരുക്കേറ്റിട്ടില്ലെന്നും അധികൃതർ അറിയിച്ചു. കാനഡയിലെ സ്വതന്ത്ര അന്വേഷണ ഏജൻസിയായ സ്പെഷ്യൽ ഇൻവെസ്റ്റിഗേഷൻസ് യൂണിറ്റ് (SIU) സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്. ആക്രമണത്തിന് പിന്നിലെ കൃത്യമായ ലക്ഷ്യം എന്താണെന്ന് ഇതുവരെ വ്യക്തമായിട്ടില്ല.
സംഭവത്തെ ഒന്റാരിയോ പ്രീമിയർ ഡഗ് ഫോർഡ് ശക്തമായി അപലപിച്ചു. കാനഡയിൽ യഹൂദവിരുദ്ധതയ്ക്ക് സ്ഥാനമില്ലെന്നും ജൂത സമൂഹത്തിന് പൂർണ്ണ പിന്തുണ നൽകുമെന്നും അദ്ദേഹം വ്യക്തമാക്കി. അക്രമത്തെത്തുടർന്ന് കാനഡയിലെ പ്രമുഖ നഗരങ്ങളിലുള്ള ജൂത ആരാധനാലയങ്ങളിലും കമ്മ്യൂണിറ്റി സെന്ററുകളിലും പൊലീസ് സുരക്ഷയും നിരീക്ഷണവും ശക്തമാക്കിയിട്ടുണ്ട്.
