ചെന്നൈ: 1998-ലെ കോയമ്പത്തൂർ സ്‌ഫോടനക്കേസിൽ ജീവപര്യന്തം തടവുശിക്ഷ അനുഭവിക്കുന്ന അഞ്ച് പ്രതികൾക്ക് 60 ദിവസത്തെ പരോൾ അനുവദിച്ച് തമിഴ്‌നാട് സർക്കാർ. കോയമ്പത്തൂർ സെൻട്രൽ ജയിലിൽ കഴിയുന്ന മുഹമ്മദ് അൻസാരി, മുഹമ്മദ് അലി, മൊണപ്പ എന്ന മുഹമ്മദ് ഹസൻ, മുഹമ്മദ് അജം, നവാബ് ഖാൻ എന്നിവർക്കാണ് പരോൾ അനുവദിച്ചത്. വ്യക്തിപരമായ സാഹചര്യങ്ങളും ആരോഗ്യപ്രശ്‌നങ്ങളും ചൂണ്ടിക്കാട്ടിയാണ് ഇവർ പരോളിന് അപേക്ഷിച്ചതെന്ന് ജയിൽ ഉദ്യോഗസ്ഥർ അറിയിച്ചു.
ഈ വർഷം ആദ്യം തന്നെ പ്രതികളുടെ പരോൾ അപേക്ഷകൾ അംഗീകരിച്ചിരുന്നെങ്കിലും നിയമസഭാ തിരഞ്ഞെടുപ്പിനെത്തുടർന്ന് മോചനം നീട്ടിവെക്കുകയായിരുന്നു. പിന്നീട് ലഭിച്ച പുതിയ അപേക്ഷകൾ പരിഗണിച്ചാണ് ഇപ്പോൾ നടപടിയെടുത്തതെന്ന് മുതിർന്ന ജയിൽ ഉദ്യോഗസ്ഥൻ വ്യക്തമാക്കി.
ദീർഘകാലമായി തടവിൽ കഴിയുന്നവർക്ക് അനുവദിച്ചുവരുന്ന സാധാരണ ഇളവുകളുടെ ഭാഗമായാണ് പരോൾ അനുവദിച്ചതെന്നാണ് സർക്കാർ വൃത്തങ്ങൾ വിശദീകരിക്കുന്നത്. മറ്റ് തടവുകാർക്ക് നൽകുന്ന ആനുകൂല്യങ്ങൾക്ക് സമാനമായ ആശ്വാസം മാത്രമാണിതെന്നും അധികൃതർ വ്യക്തമാക്കുന്നു. പരോൾ അനുവദിച്ച നടപടിയിൽ മുഖ്യമന്ത്രി വിജയ്ക്ക് ടിവികെ എംഎൽഎ വി.എം.എസ്. മുസ്തഫ നന്ദി അറിയിച്ചു.
സർക്കാർ തീരുമാനത്തിനെതിരെ ബിജെപി
അതേസമയം, പരോൾ അനുവദിച്ച സർക്കാർ നടപടിക്കെതിരെ ബിജെപി സംസ്ഥാന മുഖ്യ വക്താവ് നാരായണൻ തിരുപ്പതി രംഗത്തെത്തി. തമിഴ്‌നാടിന്റെ ചരിത്രത്തിലെ ഏറ്റവും കറുത്ത അധ്യായങ്ങളിലൊന്നായ ഭീകരാക്രമണത്തിന്റെ ഗൗരവത്തെക്കാൾ വ്യക്തിപരമായ കാരണങ്ങൾക്ക് പ്രാധാന്യം നൽകാനാകില്ലെന്ന് അദ്ദേഹം എക്‌സിൽ കുറിച്ചു.
കോയമ്പത്തൂർ സ്‌ഫോടനക്കേസിലെ ചില ജീവപര്യന്തം തടവുകാരുടെ ജാമ്യാപേക്ഷകൾ തള്ളിയ 2023 ഒക്ടോബർ നാലിലെ സുപ്രീംകോടതി ഉത്തരവും അദ്ദേഹം ചൂണ്ടിക്കാട്ടി. ശിക്ഷയ്‌ക്കെതിരായ അപ്പീലുകൾ നിലനിൽക്കുന്ന സാഹചര്യത്തിലായിരുന്നു അന്ന് കോടതി നടപടി സ്വീകരിച്ചത്.
എന്നാൽ, തടവുകാർക്ക് നിയമപ്രകാരം ലഭിക്കാവുന്ന സ്വാഭാവിക ഇളവാണ് പരോളെന്നും അത് കുറ്റകൃത്യത്തിന്റെ ഗൗരവം കുറച്ചുകാണുന്നതായി വ്യാഖ്യാനിക്കേണ്ടതില്ലെന്നും നിയമവിദഗ്ധർ ചൂണ്ടിക്കാട്ടുന്നു. 2023 ജനുവരിയിൽ ആരോഗ്യപ്രശ്‌നങ്ങൾ പരിഗണിച്ച് ഒമ്പത് പ്രതികൾക്ക് കോടതി ഇടക്കാല ഇളവ് അനുവദിച്ചിരുന്നു. തലച്ചോറിലെ ട്യൂമറും കാൻസർ ലക്ഷണങ്ങളും ചൂണ്ടിക്കാട്ടിയതിനെത്തുടർന്ന് മറ്റൊരു തടവുകാരനായ അബ്ദുൽ ഹക്കീമിന് മദ്രാസ് ഹൈക്കോടതി മൂന്ന് മാസത്തെ സാധാരണ ഇളവും അനുവദിച്ചിരുന്നു.
കേസിലെ പ്രധാന പ്രതിയും അൽ ഉമ്മ സംഘടനയുടെ സ്ഥാപകനുമായ എസ്.എ. ബാഷയ്ക്കും നേരത്തേ പലതവണ ജാമ്യം ലഭിച്ചിരുന്നു. 2024 ഡിസംബറിൽ 84-ാം വയസ്സിലാണ് ബാഷ മരിച്ചത്.
1998-ലെ സ്‌ഫോടന പരമ്പര
1998 ഫെബ്രുവരി 14-നാണ് കോയമ്പത്തൂരിൽ രാജ്യത്തെ നടുക്കിയ സ്‌ഫോടന പരമ്പര നടന്നത്. മുതിർന്ന ബിജെപി നേതാവ് എൽ.കെ. അദ്വാനി പങ്കെടുക്കേണ്ടിയിരുന്ന തിരഞ്ഞെടുപ്പ് റാലിക്ക് മുന്നോടിയായിട്ടായിരുന്നു ആക്രമണം. അദ്വാനി സ്ഥലത്ത് എത്താതിരുന്നതിനാൽ സ്‌ഫോടനത്തിൽ നിന്ന് രക്ഷപ്പെടുകയായിരുന്നു.
ആക്രമണത്തിൽ 58 പേർ കൊല്ലപ്പെടുകയും ഇരുന്നൂറിലധികം പേർക്ക് പരുക്കേൽക്കുകയും ചെയ്തു. കേസുമായി ബന്ധപ്പെട്ട് പൊലീസ് അറസ്റ്റ് ചെയ്ത 168 പേരിൽ 158 പേരെ 2007-ൽ കോടതി കുറ്റക്കാരായി കണ്ടെത്തി ശിക്ഷിച്ചു. ഇവരിൽ 43 പേർക്ക് ജീവപര്യന്തം തടവുശിക്ഷയാണ് വിധിച്ചത്.
