വാഷിങ്ടണ്‍: ഇറാനിലെ പിക്ക്ആക്‌സ് മൗണ്ടന്‍ ഉള്‍പ്പെടെയുള്ള നാല് ആണവ കേന്ദ്രങ്ങളിലെ പ്രവര്‍ത്തനങ്ങള്‍ സൂക്ഷ്മമായി നിരീക്ഷിച്ചു വരികയാണെന്ന് അമേരിക്ക വ്യക്തമാക്കി. അതിനിടെ, ഇസ്രയേലില്‍ നടക്കുന്ന തിരഞ്ഞെടുപ്പിന് മുന്നോടിയായി ഇറാന്‍ തങ്ങള്‍ക്കെതിരെ ആക്രമണം നടത്താന്‍ സാധ്യതയുണ്ടെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു ആരോപിച്ചു. എന്നാല്‍, അമേരിക്കയില്‍ നിന്നും ഇസ്രായേലില്‍ നിന്നും ഉയരുന്ന ശക്തമായ യുദ്ധഭീഷണികള്‍ക്ക് മുന്നില്‍ ഭയന്നു പിന്മാറില്ലെന്നാണ് ഇറാന്‍ ഇതിനോട് പ്രതികരിച്ചത്.
അതിനിടെ, ഇന്ത്യന്‍ മഹാസമുദ്രത്തില്‍ അപകടത്തില്‍പ്പെട്ട 40 ഇറാനിയന്‍ നാവികരെ ശ്രീലങ്കന്‍ നാവികസേന വിജയകരമായി രക്ഷപ്പെടുത്തി. ശ്രീലങ്കന്‍ തീരത്തിന് സമീപത്തു വച്ച് 19 വാണിജ്യ കപ്പലുകളില്‍ നിന്നായാണ് ഇവരെ കരയ്‌ക്കെത്തിച്ചത്. ഇറാന്‍ എംബസിയുടെ ഔദ്യോഗിക അഭ്യര്‍ഥനയെ തുടര്‍ന്നായിരുന്നു ശ്രീലങ്കന്‍ നാവികസേനയുടെ സമയോചിതമായ ഈ രക്ഷാപ്രവര്‍ത്തനം.
രക്ഷപ്പെടുത്തിയ നാവികരെ ആദ്യം ഗാലെ തുറമുഖത്താണ് എത്തിച്ചത്. തുടര്‍ന്ന് പ്രാഥമിക സഹായങ്ങള്‍ക്ക് ശേഷം ഇവര്‍ ഇറാനിലേക്ക് മടങ്ങി. മെഡിക്കല്‍ എമര്‍ജന്‍സിയെ തുടര്‍ന്നാണ് അടിയന്തര രക്ഷാപ്രവര്‍ത്തനം നടത്തേണ്ടി വന്നതെന്നാണ് ലഭ്യമാകുന്ന വിവരങ്ങള്‍. എന്നാല്‍ കപ്പലുകളില്‍ നിന്ന് നാവികരെ ഒഴിപ്പിക്കേണ്ടി വന്ന അടിയന്തര സാഹചര്യത്തെക്കുറിച്ചുള്ള കൂടുതല്‍ വിശദാംശങ്ങള്‍ നിലവില്‍ പുറത്തുവന്നിട്ടില്ല.
