ടെഹ്റാൻ: അമേരിക്കയും ഇറാനും തമ്മിലുള്ള സംഘർഷം ലഘൂകരിക്കാൻ നയതന്ത്ര നീക്കങ്ങൾ തുടരുന്നതിനിടെ ഇറാനിൽ വീണ്ടും സ്ഫോടനശബ്ദങ്ങൾ. ഹോർമുസ് കടലിടുക്കിലെ ഖിഷം ദ്വീപിലും ജാസ്ക്, സിറിക്, ബന്ദർ അബ്ബാസ് നഗരങ്ങളിലും സ്ഫോടനങ്ങൾ കേട്ടതായി ഇറാനിയൻ മാധ്യമങ്ങൾ റിപ്പോർട്ട് ചെയ്തു. അതേസമയം, ഇറാനെതിരായ നാവിക ഉപരോധം കരമാർഗമുള്ള വ്യാപാരത്തിലേക്കും വ്യാപിപ്പിക്കാൻ അമേരിക്ക നീക്കം ആരംഭിച്ചിട്ടുണ്ട്.
സ്ഫോടനങ്ങളുടെ കാരണം വ്യക്തമല്ല
ഖിഷം ദ്വീപിന്റെ കിഴക്കൻ മേഖലയിൽ രണ്ട് സ്ഫോടനശബ്ദങ്ങൾ കേട്ടതായാണ് ഇറാന്റെ ഔദ്യോഗിക വാർത്താ ഏജൻസിയായ ഐആർഎൻഎ റിപ്പോർട്ട് ചെയ്തത്. ജാസ്ക്, സിറിക്, ബന്ദർ അബ്ബാസ് എന്നിവിടങ്ങളിലും സ്ഫോടനശബ്ദങ്ങൾ കേട്ടതായി റിപ്പോർട്ടുകളുണ്ട്.
എന്നാൽ സ്ഫോടനങ്ങളുടെ യഥാർഥ കാരണം സംബന്ധിച്ച് വ്യക്തതയില്ല. ഇവ ഇറാന്റെ സൈനിക നീക്കങ്ങളുമായി ബന്ധപ്പെട്ടതാകാമെന്നാണ് ചില റിപ്പോർട്ടുകൾ സൂചിപ്പിക്കുന്നത്.
ഇറാന്റെ കരമാർഗ വ്യാപാരവും തടയാൻ അമേരിക്ക
ഇറാനെതിരായ സമ്മർദം ശക്തമാക്കുന്നതിന്റെ ഭാഗമായി കരമാർഗമുള്ള വിതരണ ശൃംഖലകൾ തടയാൻ അമേരിക്ക പുതിയ നീക്കം പ്രഖ്യാപിച്ചു. ഇതിനായി ‘ടാസ്ക് ഫോഴ്സ് അയൺ ഗേറ്റ്’ രൂപീകരിച്ചതായി റിപ്പോർട്ടുകളുണ്ട്. ഇറാനിലേക്കുള്ള ആയുധങ്ങൾ, ഉപരോധം നേരിടുന്ന ഉൽപ്പന്നങ്ങൾ, ഇരട്ട ഉപയോഗ സാങ്കേതികവിദ്യകൾ എന്നിവയുടെ നീക്കം തടയുകയാണ് ലക്ഷ്യം. കാസ്പിയൻ കടൽ മേഖലയിലൂടെയുള്ള വ്യാപാരവും നിരീക്ഷണ പരിധിയിൽ വരും.
നയതന്ത്ര ചർച്ചകൾക്കും നീക്കം
സംഘർഷം അവസാനിപ്പിക്കാനുള്ള സാധ്യതകൾ തേടി ഖത്തറിന്റെ മധ്യസ്ഥതയിൽ നയതന്ത്ര ചർച്ചകൾ പുരോഗമിക്കുകയാണ്. ഇറാന്റെ ആണവപദ്ധതിയുമായി ബന്ധപ്പെട്ട തർക്കങ്ങൾ ഉൾപ്പെടെയുള്ള വിഷയങ്ങളിൽ ഖത്തർ മുന്നോട്ടുവെച്ച നിർദേശങ്ങൾ ഇറാൻ പരിശോധിക്കുന്നതായാണ് റിപ്പോർട്ട്. എന്നാൽ അമേരിക്കയുമായുള്ള ചർച്ചകൾക്ക് ഇറാൻ ചില ഉപാധികൾ മുന്നോട്ടുവെച്ചിട്ടുണ്ട്.
തിരിച്ചടിക്കുമെന്ന് ഇറാന്റെ മുന്നറിയിപ്പ്
അമേരിക്കയുടെ ഭാഗത്തുനിന്ന് പുതിയ ആക്രമണമുണ്ടായാൽ ശക്തമായ തിരിച്ചടി നൽകുമെന്ന മുന്നറിയിപ്പുമായി ഇറാൻ രംഗത്തെത്തിയിട്ടുണ്ട്. ഇറാന്റെ സൈനിക സംവിധാനങ്ങൾക്കിടയിലെ ഏകോപനം ശക്തമാണെന്നും ആക്രമണമുണ്ടായാൽ അതിന്റെ പ്രത്യാഘാതങ്ങൾ ഗുരുതരമായിരിക്കുമെന്നും ഇറാൻ സൈനിക നേതൃത്വം വ്യക്തമാക്കിയതായി റിപ്പോർട്ടുകളുണ്ട്.
അതേസമയം, ബാലിസ്റ്റിക് മിസൈലുകളുടെ ദൂരപരിധിയിൽ സ്വയം ഏർപ്പെടുത്തിയിരുന്ന 2,000 കിലോമീറ്റർ നിയന്ത്രണം പിൻവലിച്ചതായി ഇറാൻ റെവല്യൂഷണറി ഗാർഡ് അറിയിച്ചു.
ഹോർമുസിൽ എണ്ണക്കപ്പലുകൾക്ക് ഭീഷണി
ഹോർമുസ് കടലിടുക്കിൽ കടൽമൈനുകളിൽ തട്ടി രണ്ട് എണ്ണക്കപ്പലുകൾക്ക് കേടുപാടുകൾ സംഭവിച്ചതായും തീപിടിച്ചതായും ഇറാൻ റെവല്യൂഷണറി ഗാർഡിന്റെ നാവികസേന അറിയിച്ചു. അതേസമയം, അമേരിക്കൻ ഉപരോധം ലംഘിച്ച് കടന്നുപോകാൻ ശ്രമിച്ച ഒരു വാണിജ്യക്കപ്പലിനെ പ്രവർത്തനരഹിതമാക്കിയതായി അമേരിക്കൻ സൈന്യവും വ്യക്തമാക്കി.
സംഘർഷം വീണ്ടും ശക്തമായാൽ പശ്ചിമേഷ്യയിലെ മറ്റ് രാജ്യങ്ങളിലേക്കും യുദ്ധം വ്യാപിക്കാനുള്ള സാധ്യതയുണ്ടെന്ന ആശങ്ക ശക്തമാണ്. നയതന്ത്ര ചർച്ചകൾ തുടരുന്നതിനിടയിലെ പുതിയ സംഭവവികാസങ്ങൾ മേഖലയുടെ സുരക്ഷാ സാഹചര്യത്തെ കൂടുതൽ സങ്കീർണമാക്കുകയാണ്.
