2016ല്‍ ബംഗാള്‍ ഉള്‍ക്കടലില്‍ കാണാതായ ഇന്ത്യന്‍ വ്യോമസേനയുടെ എഎന്‍-32 വിമാനത്തിന്റെ അവശിഷ്ടങ്ങള്‍ കണ്ടെത്തി. ചെന്നൈ തീരത്ത് നിന്ന് 310 കിലോമീറ്റര്‍ അകലെ നിന്നാണ് അവശിഷ്ടങ്ങള്‍ കണ്ടെത്തിയത്. കാണാതാകുമ്പോള്‍ 29 വ്യോമസേന ഉദ്യോഗസ്ഥര്‍ വിമാനത്തിലുണ്ടായിരുന്നു.
‘അവശിഷ്ടങ്ങളുടെ ചിത്രങ്ങള്‍ സൂക്ഷ്മമായി പരിശോധിച്ചു. ഒരു An-32 വിമാനവുമായി സാമ്യമുള്ളതാണ് അവ. ഈ പ്രദേശത്ത് മറ്റേതെങ്കിലും വിമാനം കാണാതായതായോ അപകടത്തില്‍പെട്ടതായോ റിപ്പോര്‍ട്ടുകളില്ല. അതിനാലാണ് ഇത് കാണാതായ An-32 (K-2743) വിമാനത്തിന്റേതാണെന്ന് കരുതുന്നത്’, സര്‍ക്കാര്‍ പുറത്തിറക്കിയ പ്രസ്താവനയില്‍ വ്യക്തമാക്കി.
2016 ജൂലൈ 22ന് രാവിലെ ചെന്നൈയിലെ താംബരം എയര്‍ഫോഴ്സ് സ്റ്റേഷനില്‍ നിന്നാണ് ഐഎഎഫ് അന്റോനോവ് എഎന്‍-32 വിമാനം പറന്നുയര്‍ന്നത്. ആന്‍ഡമാന്‍ നിക്കോബാര്‍ ദ്വീപുകളിലെ പോര്‍ട്ട് ബ്ലെയറിലേക്കായിരുന്നു യാത്ര. എല്ലാ ആഴ്ചയും നടത്താറുള്ള യാത്രയ്‌ക്കെത്തിയ ഈ ട്രാന്‍സ്പോര്‍ട്ട് വിമാനത്തില്‍ ജീവനക്കാരുള്‍പ്പെടെ 29 പേര്‍ ഉണ്ടായിരുന്നു. രാവിലെ എട്ടുമണിക്ക് ചെന്നൈയില്‍ നിന്ന് പറന്നുയര്‍ന്ന വിമാനം പോര്‍ട്ട് ബ്ലെയറിലെ ഇന്ത്യന്‍ നാവികസേനാ എയര്‍ സ്റ്റേഷനായ ഐഎന്‍എസ് ഉത്‌ക്രോഷില്‍ ലാന്‍ഡ് ചെയ്യാനാണ് നിശ്ചയിച്ചിരുന്നത്.
